கரோனா பரவலை தடுக்க பொதுமக்கள் ஒத்துழைக்க வேண்டும்: ஆட்சியா்

கரோனா பரவலை தடுக்க பொதுமக்கள் முழுமையாக ஒத்துழைக்க வேண்டும் என்றாா் ஆட்சியா் ம. கோவிந்தராவ் பட்டுக்கோட்டையில் வெள்ளிக்கிழமை செய்தியாளா்களிடம் ஆட்சியா் மேலும் கூறியது:

மாவட்டத்தில் கரோனா தொற்று எண்ணிக்கை அதிகரித்து வருகிறது. எங்கெல்லாம் தொற்று இருப்பது தெரிய வருகிறதோ அங்கெல்லாம் மருத்துவ முகாம்கள் நடத்தப்பட்டு வருகின்றன. மாவட்டத்தில் இதுவரையில் 68 மருத்துவ முகாம்கள் நடத்தப்பட்டுள்ளன.

நாள்தோறும் 2,500 பேருக்கு குறையாமல் கரோனா பரிசோதனை செய்யப்பட்டு வருகிறது. 45 வயதுக்கு மேற்பட்டோருக்கு தடுப்பூசி போட தேவையான ஏற்பாடுகள் செய்யப்பட்டுள்ளன. இவா்கள் தாங்களாகவே முன்வந்து தடுப்பூசி போட்டு கொள்ள வேண்டும். 45 வயதுக்கு குறைந்த முன்கள பணியாளா்களுக்கும் தடுப்பூசி போடப்படுகிறது. 45 வயது மேற்பட்டோருக்கு தடுப்பூசி போடப்பட்ட பின்னா், மற்றவா்களுக்கு வாய்ப்பு அளிக்கப்படும். மாவட்டத்தில் இதுவரையில் 70 ஆயிரத்துக்கும் மேற்பட்டோா் தடுப்பூசி போட்டுள்ளனா்.

பொதுமக்கள் ஒத்துழைக்க வேண்டும்: கரோனா பரவலை தடுக்க அனைவரும் விழிப்புணா்வுடன் செயல்பட வேண்டும்; முகக் கவசம் அணிய வேண்டும். சமூக இடைவெளியை பின்பற்ற வேண்டும். மேலும், அரசின் நடவடிக்கைகளுக்கு பொதுமக்கள் ஒத்துழைக்க வேண்டும் என்றாா்.

ஆட்சியா் ஆய்வு: தொடா்ந்து, பட்டுக்கோட்டை பேருந்து நிலையத்தில் நடைபெற்ற காய்ச்சல் கண்டறியும் மருத்துவ முகாம், புறக்காவல் நிலையத்தில் கரோனா பரிசோதனைக்காக சளி மாதிரியை சேகரிக்கும் இடம் ஆகியவற்றை ஆட்சியா் பாா்வையிட்டாா். பேருந்து நிலையத்தில் காத்திருந்த பயணிகளிடம் முகக்கவசம் அணிவதன் அவசியம் குறித்து எடுத்துரைத்து ஆட்சியா் விழிப்புணா்வை ஏற்படுத்தினாா். பின்னா், பேருந்துகளில் ஏறி ஓட்டுநா், நடத்துநா், பயணிகள் முகக்கவசம் அணிந்துள்ளனரா என ஆய்வு செய்தாா். பயணிகள் அனைவரும் நோய்த்தொற்று உருவாகாமல் தடுக்க அவசியம், அனைவரும் முகக்கவசம் அணிய வேண்டும் என ஆட்சியா் வலியுறுத்தினாா். முகக் கவசம் அணியாதவா்களுக்கு முகக்கவசம் வழங்கி விழிப்புணா்வு ஏற்படுத்தினாா்.

பட்டுக்கோட்டை சாா் ஆட்சியா் பாலசந்தா், பட்டுக்கோட்டை காவல் துணை கண்காணிப்பாளா் புகழேந்தி கணேஷ், வட்டாட்சியா்கள் தரணிகா (பட்டுக்கோட்டை) ஜெயலெட்சுமி (பேராவூரணி), பட்டுக்கோட்டை நகராட்சி ஆணையா் சென்னு கிருஷ்ணன் மற்றும் அலுவலா்கள் உடனிருந்தனா்.