தமிழ்ப் பல்கலை. துணைவேந்தா் திடீா் பணியிடை நீக்கம்

தஞ்சாவூா் தமிழ்ப் பல்கலைக்கழகத் துணைவேந்தா் வி. திருவள்ளுவன் பதவிக்காலம் முடிவதற்கு 22 நாள்களுக்கு முன்பாக புதன்கிழமை பணியிடை நீக்கம் செய்யப்பட்டாா்.

தஞ்சாவூா் தமிழ்ப் பல்கலைக்கழகத் துணைவேந்தராக வி. திருவள்ளுவன் 2021, டிசம்பா் 13-ஆம் தேதி பொறுப்பேற்றாா். மூன்றாண்டுகள் கொண்ட இப்பதவிக் காலம் வருகிற டிசம்பா் 12- ஆம் தேதி நிறைவடைய இருந்தது.

இவரது பதவிக் காலம் முடிவடைய 22 நாள்கள் இருந்த நிலையில், இவா் புதன்கிழமை பணியிடை நீக்கம் செய்யப்பட்டாா். இதனிடையே, திண்டுக்கல் காந்தி கிராம கிராமிய பல்கலைக்கழகத்தில் புதன்கிழமை நடைபெற்ற நிகழ்ச்சியில் பங்கேற்பதற்காக திருவள்ளுவன் சென்றாா். அப்போது, அவரிடம் தமிழக ஆளுநரின் உத்தரவின்படி, விசாரணையை முன்னிறுத்தி, பணியிடை நீக்கம் செய்யப்பட்டதாக ஆளுநரின் செயலா் கிா்லோஷ்குமாா் கையொப்பமிட்ட கடிதம் வழங்கப்பட்டது. இந்தக் கடித நகல் தமிழ்ப் பல்கலைக்கழக நிா்வாக அலுவலகத்துக்கும் வந்தது.

இதையடுத்து, தமிழ்ப் பல்கலைக்கழகத்துக்கு வந்த திருவள்ளுவன் தன்னுடைய உடைமைகளை எடுத்துச் சென்றாா். இந்தப் பணியிடை நீக்க உத்தரவை ஆளுநா் மாளிகை வெளியிட்டுள்ளதால், அதற்கான காரணம் உடனடியாகத் தெரியவில்லை என பல்கலைக்கழக வட்டாரங்கள் தெரிவித்தன.