தலைமைத் தோ்தல் ஆணையரை பதவி நீக்கக் கோரி காங்கிரஸ் ஆா்ப்பாட்டம்

தலைமை தோ்தல் ஆணையா் ஞானேஷ்குமாரை பதவி நீக்கம் செய்யக் கோரி, தஞ்சாவூா் தலைமை அஞ்சலகம் அருகே காங்கிரஸ் கட்சியினா் திங்கள்கிழமை ஆா்ப்பாட்டத்தில் ஈடுபட்டனா்.

தஞ்சாவூா் தெற்கு, வடக்கு, மாநகர மாவட்ட காங்கிரஸ் கமிட்டிகள் சாா்பில் நடைபெற்ற ஆா்ப்பாட்டத்துக்கு மாநகர மாவட்டத் தலைவா் எம். மகேந்திரன் தலைமை வகித்தாா். ஆா்ப்பாட்டத்தில் மயிலாடுதுறை எம்.பி. ஆா். சுதா கண்டன உரையாற்றினாா்.

இதில், வாக்காளா் சிறப்பு திருத்தமான எஸ்.ஐ.ஆா்.-இல் பல்வேறு குளறுபடிகளைச் செய்த தலைமைத் தோ்தல் ஆணையா் ஞானேஷ்குமாரை உடனடியாக பதவி நீக்கம் செய்ய வேண்டும். அவரைக் கைது செய்து, அவா் மீது சட்ட நடவடிக்கைகளை மேற்கொள்ள வேண்டும். எஸ்ஐஆா் மேற்கொள்ளப்பட்ட மாநிலங்களில் தகுதி நீக்கம் செய்யப்பட்ட வாக்காளா்களை மீண்டும் உடனடியாக வாக்காளா் பட்டியலில் சோ்க்க வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.

அகில இந்திய காங்கிரஸ் கமிட்டி உறுப்பினா்கள் பட்டுக்கோட்டை என். ராஜேந்திரன், து. கிருஷ்ணசாமி வாண்டையாா், பி.ஜி. ராஜேந்திரன், ஓ.வி.எம். கிருஷ்ணசாமி, ராஜ்மோகன், கும்பகோணம் மேயா் க. சரவணன், தஞ்சாவூா் வடக்கு மாவட்டத் தலைவா் குமரன், தெற்கு மாவட்டத் துணைத் தலைவா் கோ. அன்பரசன், மாநிலப் பொதுக் குழு உறுப்பினா்கள் ஏ. ஜேம்ஸ், வயலூா் எஸ். ராமநாதன் உள்பட ஏராளமானோா் கலந்து கொண்டனா்.