முக்கொம்பு அணையில் பழுதடைந்துள்ள மின்மோட்டாா் அறை

திருச்சி: திருச்சி முக்கொம்பு அணையில் மதகுகளை (ஷட்டா்) இயக்கப் பயன்படும் மின் மோட்டாா் அறை கட்டடம் மிகவும் பழுதடைந்துள்ளதால் அதை உடனே சீரமைக்க வலியுறுத்தப்பட்டுள்ளது.

மேட்டூரிலிருந்து டெல்டா மாவட்டங்களுக்கு திறந்து விடப்படும் தண்ணீா், திருச்சி மாவட்டம், முக்கொம்பு அணையில் தேக்கப்பட்டு காவிரி, கொள்ளிடம் ஆறுகளில் பிரித்து அனுப்பப்படுகிறது. இங்கு தடுப்பணையில் உள்ள ஷட்டா்களை இயக்க 1977 ஆம் ஆண்டில் கட்டப்பட்ட மின் மோட்டாா் அறை (பவா் ஹவுஸ்) உள்ளது.

100 கிலோ வாட் திறன் கொண்ட மற்றும் 40 கிலோ வாட் திறன் கொண்ட ஜெனரேட்டா் உள்ளிட்ட இயந்திரங்கள் உள்ள இந்தக் கட்டடம் தற்போது மிகவும் பழுதடைந்து சுவா்கள், மேற்கூரைகளில் ஆங்காங்கு விரிசல் ஏற்பட்டு, ஆபத்தான நிலையில் உள்ளது.

இந்த அறை இடிந்தால் அணையின் மதகுகளை இயக்குவதில் சிக்கல் ஏற்படும் அபாயம் உள்ளது. எனவே இதை உடனடியாகச் சீரமைக்க வலியுறுத்தப்பட்டுள்ளது. ஏற்கெனவே இதுபோல பாலத்தில் விரிசல் காணப்பட்ட நிலையில், முக்கொம்பில் கொள்ளிடம் ஆற்றுக்குத் திறந்து விடும் மதகுகள் சில பாலத்துடன் உடைந்தது குறிப்பிடத்தக்கது.

இதுகுறித்து முன்னோடி விவசாயி கவண்டம்பட்டி சுப்பிரமணியன் கூறுகையில்,

இந்த மின் மோட்டாா் அறை கட்டடத்தின் சுவா்கள் மட்டுமின்றி, மேற்கூரையும் சரிந்துள்ளதால் பல இடங்களில் சவுக்கு கட்டைகளைக் கொண்டு முட்டுக் கொடுத்துள்ளனா். இந்தக் கட்டடம் இடிந்து விட்டால், ஷட்டா்களை ஏற்றி இறக்க முடியாது. இதனால் நீரை ஒழுங்குபடுத்தி பாசனத்துக்கு வழங்குவதில் சிக்கல் ஏற்படும். அதிகளவில் வெள்ளம் வந்தால் நிலைமையைச் சமாளிக்க முடியாத நிலை ஏற்படும்.

எனவே, இந்தக் கட்டடத்தை விரைந்து சீரமைக்க நடவடிக்கை எடுக்க வேண்டும் என்றாா். இதுகுறித்து பொதுப்பணித் துறை வட்டாரத்தில் விசாரித்தபோது, “இந்தக் கட்டடத்தை சீரமைக்க நடவடிக்கை எடுக்கப்படுகிறது”எனத் தெரிவித்தனா்.

Image Caption

மின் மோட்டாா் அறையின் சுவா் மற்றும் கூரையில் ஏற்பட்டுள்ள விரிசல்.