மன அழுத்தம் நீங்க காவல் துறையினருக்கு பயிற்சி

திருச்சியில் மன அழுத்தம் நீங்க காவல் துறையினருக்கு விளையாட்டு, சிலம்பம் மற்றும் யோகா பயிற்சிகள் ஞாயிற்றுக்கிழமை அளிக்கப்பட்டன.

திருச்சி சுப்பிரமணியபுரம் பகுதி ஆயுதப்படை மைதானத்தில் காவல் பயிற்சி பள்ளிக் காவலா்களுக்கும், ஆயுதப்படை காவலா்களுக்கும், அவா்களது குழந்தைகளுக்கும் சிலம்பம், கராத்தே மற்றும் மன அழுத்தத்தை குறைக்கும் பயிற்சிகள் ஞாயிற்றுக்கிழமை அளிக்கப்பட்டன.

பயிற்சியை திருச்சி சரக காவல் துறைத் துணைத் தலைவா் இசட். ஆனிவிஜயா தொடங்கி வைத்தாா். பயிற்சியில் பங்கேற்றோரை ஊக்கப்படுத்தும் வகையில் அவா் சிலம்பம், கராத்தே பயிற்சிகளை செய்தாா்.

இப்பயிற்சியானது தங்களின் உடல் மற்றும் மன ஆரோக்கியத்தை மேம்படுத்தவும், ஊக்கமளிக்கும் வகையில் இருந்தது என போலீஸாா் தெரிவித்தனா்.