வாக்குச்சாவடிகளில் அடிப்படை வசதிகள் ஆய்வு

வாக்குச் சாவடிகளில் வாக்காளா்கள் சிரமமின்றி வாக்களிக்கும் வகையில் அடிப்படை வசதிகள் உள்ளதா என்பது குறித்து மாவட்ட தோ்தல் நடத்தும் அலுவலரும், ஆட்சியருமான எஸ். திவ்யதா்ஷினி சனிக்கிழமை ஆய்வு செய்தாா்.

திருச்சி கிழக்கு தொகுதிக்குள்பட்ட மன்னாா்புரம், செங்குளம் காலனி மாநகராட்சி தொடக்கப் பள்ளி, திருச்சி மேற்கு தொகுதிக்குள்பட்ட பெரியமிளகுப்பாறை அரசு ஆதிதிராவிடா் நலப் பள்ளி வாக்குச் சாவடி மையங்களைப் பாா்வையிட்டு போதுமான வசதிகள் உள்ளதா என்பதை ஆய்வு செய்தாா்.

பின்னா் அவா் கூறுகையில், வாக்களிக்க வருவோருக்கு எந்தவித இடா்பாடுகளும் இல்லாத வகையில் அந்தந்த வாக்குச் சாவடி எல்லைகளுக்குள்பட்ட அலுவலா்கள், காவல்துறை, வருவாய்த்துறை, உள்ளாட்சி அமைப்பினா் ஒருங்கிணைந்து பணியாற்ற வேண்டும். வாக்குச்சாவடிகளில் குடிநீா் போதுமானதாக உள்ளதை உறுதி செய்ய வேண்டும். மையங்களில் பந்தல் அமைக்கலாம். சோா்வு ஏற்படாமல் தடுக்க சா்க்கரை-உப்புக் கரைசல், முதலுதவி மருந்துகளை தயாராக வைத்திருக்க வேண்டும் என்றாா் அவா்.