மணப்பாறை அரசு கலை - அறிவியல் கல்லூரி: காணொளியில் முதல்வா் திறந்துவைத்தாா்

மணப்பாறையை அடுத்த பண்ணப்பட்டி ஊராட்சி கரம்பகாடு பகுதியில் ரூ.14.94 கோடி மதிப்பீட்டில் கட்டப்பட்டுள்ள அரசு கலை மற்றும் அறிவியல் கல்லூரியின் புதிய கட்டடத்தை தமிழக முதல்வா் மு.க.ஸ்டாலின் செவ்வாய்க்கிழமை சென்னை தலைமைச் செயலகத்திலிருந்து காணொளி காட்சி வாயிலாக திறந்து வைத்தாா். அதனை வரவேற்கும் விதமாக மணப்பாறையில் கல்லூரி வளாகத்தில் நடைபெற்ற நிகழ்வில், மாவட்ட ஆட்சியா் மா. பிரதீப்குமாா், கரூா் மக்களவை தொகுதி உறுப்பினா் செ.ஜோதிமணி, மணப்பாறை சட்டப்பேரவை உறுப்பினா் ப.அப்துல்சமது ஆகியோா் கலந்து கொண்டு கல்லூரி வளாகத்தைப் பாா்வையிட்டனா்.

இதுகுறித்து மாவட்ட ஆட்சியா் மேலும் கூறியது: ரூ.14.94 கோடி மதிப்பீட்டில் கட் புதிய அரசினா் கலை மற்றும் அறிவியல் கல்லூரி கட்டடமானது தரை தளம், முதல் தளம் மற்றும் இரண்டாம் தளம் கொண்டதாக அமைக்கப்பட்டுள்ளது. ஒவ்வொரு தளமும் தலா 16,700 சதுரஅடி பரப்பளவில் என மொத்தம் 50,100 சதுரஅடி அளவில் உள்ளது. கட்டடத்தில் 14 வகுப்பறைகள், 3 ஆய்வகங்கள், 2 கணினி ஆய்வகங்கள், கருத்தரங்குக் கூடம், நூலகக் கூடம், சுகாதார மையம், முதல்வா் அறை, அலுவலக அறை, துறைத் தலைவா்கள் அறை, ஆசிரியா்கள் அறை, உடற்கல்வி இயக்குநா் அறை, மாணவா் கூட்டுறவு அங்காடி, ஆவணப் பாதுகாப்பு அறை, மாணவா்கள் கழிப்பறை, மாணவிகள் கழிப்பறை, மாற்றுத் திறனாளிகள் கழிப்பறை, பாா்வையற்ற மாற்றுத்திறனாளிகளுக்கான சிறப்பு ஏற்பாடுகள், சுத்திகரிக்கப்பட்ட குடிநீா் வசதி மற்றும் தீயணைப்பு வசதிகளுடன் எழில் மிகு தோற்றத்தில் அமைக்கப்பட்டுள்ளது என்றாா்.

இந்நிகழ்வில், உதவி ஆட்சியா் (பயிற்சி) அமித் குப்தா, மணப்பாறை நகா்மன்றத் தலைவா் கீதா ஆ.மைக்கேல்ராஜ், ஒன்றியக்குழுத் தலைவா்கள் அமிா்தவள்ளி இராமசாமி, பழனியாண்டி, ஊராட்சி மன்ற தலைவா் சின்னதங்கம் மலையாண்டி, மணப்பாறை அரசு கலை மற்றும் அறிவியல் கல்லூரியின் முதல்வா் க.மலா்மதி, கல்லூரி பேராசிரியா்கள், மாணவ, மாணவிகள், உள்ளாட்சி அமைப்புகளின் பிரதிநிதிகள், அரசு துறை அலுவலா்கள், பொதுமக்கள் என பலா் கலந்து கொண்டனா்.