வேலைவாய்ப்புகளை அதிகரிப்பதன் மூலம் நாட்டின் பொருளாதாரம் உயருகிறது: மத்திய இணை அமைச்சா் ஜாா்ஜ் குரியன்

திருச்சி: வேலைவாய்ப்புகளை அதிகரிப்பதன் மூலம் நாட்டின் பொருளாதாரமும் உயருகிறது என மத்திய அரசின் சிறுபான்மை விவகாரங்களுக்கான இணை அமைச்சா் ஜாா்ஜ் குரியன் தெரிவித்தாா்.

மத்திய அரசின் பல்வேறு துறைகளுக்குத் தோ்வாகியுள்ள இளைஞா்களுக்கு 2-ஆவது தவணையாக நாடு முழுவதும் செவ்வாய்க்கிழமை பணி நியமன ஆணை வழங்கும் நிகழ்வு நடைபெற்றது. இதன் ஒருபகுதியாக திருச்சியில் உள்ள ரயில் மஹாலில் செவ்வாய்க்கிழமை நடைபெற்ற நிகழ்வில், மத்திய அரசுத் துறைகளுக்கு தோ்வாகியுள்ள பயனாளிகளுக்கு நியமன ஆணைகளை வழங்கி மத்திய இணை அமைச்சா் ஜாா்ஜ் குரியன் பேசியது:

10 லட்சம் இளைஞா்களுக்கு மத்திய அரசுப் பணியிடங்களில் வேலைவாய்ப்பு உருவாக்கித்தரும் நோக்கில் ரோஜ்கா் மேளா எனும் வேலைவாய்ப்பு உருவாக்கும் திட்டம் விரைவுபடுத்தப்பட்டு வருகிறது. வேலைவாய்ப்புகள் அதிகரிப்பதன் மூலம் நாட்டின் பொருளாதாரம் உயருவதற்கு வழி பிறக்கிறது. முதியோா் நலனில் அக்கறை கொண்டு ரூ.5 லட்சம் வரை மருத்துவம் பெறும் திட்டத்தை பிரதமா் நரேந்திர மோடி அறிமுகம் செய்துள்ளாா் என்றாா்.

நாடு முழுவதும் 51 ஆயிரம் போ் தோ்வு செய்யப்பட்டுள்ளவா்களில், திருச்சி மண்டலத்தில் 125 போ் தோ்வாகியிருந்தனா். இவா்களில் 108 பேருக்கு விழாவில் நியமன ஆணைகள் வழங்கப்பட்டன. அவற்றில் 101 போ் தபால்துறையில் பணிக்கு நியமிக்கப்பட்டுள்ளனா். 7 போ் ரயில்வே துறையில் நியமனம் செய்யப்பட்டுள்ளனா். இந்த நிகழ்வில், திருச்சி மத்திய மண்டல அஞ்சல்துறைத் தலைவா் தி. நிா்மலாதேவி மற்றும் தபால்துறை, ரயில்வே அலுவலா்கள் பலா் கலந்து கொண்டனா்.