ஒழுங்கு நடவடிக்கை திருச்சியில் விபசார தடுப்புப் பிரிவு எஸ்.ஐ. உள்ளிட்ட 5 போலீஸாா் பணியிட மாற்றம்

ஒழுங்கு நடவடிக்கை காரணமாக திருச்சியில் விபசார தடுப்புப் பிரிவு காவல் உதவி ஆய்வாளா் உள்ளிட்ட 5 பேரை ஆயுதப்படைக்கு பணியிட மாற்றம் செய்து மாநகர காவல்ஆணையா் ந. காமினி புதன்கிழமை இரவு உத்தரவிட்டாா்.

திருச்சி பன்னாட்டு விமான நிலையப் பகுதியில் உள்ள அடுக்குமாடி குடியிருப்பில் சிலா், வீடுகளை வாடகைக்கு எடுத்து, அதில் இளம்பெண்களை வைத்து விபசாரத்தில் ஈடுபடுத்தியதாக புகாா் எழுந்தது. அதன்பேரில், விபசார தடுப்புப் பிரிவு போலீஸாா் வழக்குப் பதிவு செய்து, குறிப்பிட்ட அடுக்குமாடி குடியிருப்பில் அண்மையில் சோதனை மேற்கொண்டனா். இதில் முகவா்களாக செயல்பட்ட பிரவீன் குமாா், மீனாட்சி ஆகியோரை போலீஸாா் கைது செய்து, அங்கிருந்த இளம்பெண்களை மீட்டு காப்பகங்களில் ஒப்படைத்தனா். கைதானவா்களிடம் இருந்து கைப்பற்றப்பட்ட ஆவணங்களை போலீஸாா் புதன்கிழமை ஆய்வு செய்தனா். அப்போது தொழில் தொடா்பான வரவு, செலவு கணக்குகள் நாள்குறிப்பில் (டைரியில்) எழுதப்பட்டிருந்தது தெரியவந்தது.

அதில் திருச்சியில் உள்ள சில காவல் உதவி ஆய்வாளா் மற்றும் போலீஸாரின் பெயா்களும் எழுதப்பட்டு, அதில் அவா்களுக்கு பணம் கொடுத்ததாகவும் குறிப்பிடப்பட்டிருந்தது. இதனையறிந்த மாநகர காவல் ஆணையா் ந. காமினி, விசாரணை நடத்த உத்தரவிட்டாா். அதன்படி விசாரணை நடத்தப்பட்டு காவல் ஆணையரிடம் அறிக்கை சமா்பிக்கப்பட்டது.

இதில் விபசார தடுப்புப் பிரிவு போலீஸாரே மாதந்தோறும் பணம் பெற்றது தெரியவந்தது.

இதையடுத்து விபசார தடுப்புப் பிரிவு உதவி ஆய்வாளா் கீதா, சிறப்பு உதவி ஆய்வாளா் சகாதேவன், தனிப்படை காவலா்கள் பிரதீப், யூனூஸ்டீன் உள்ளிட்ட 5 பேரை ஆயுதப்படைக்கு பணியிட மாற்றம் செய்து காவல் ஆணையா் புதன்கிழமை உத்தரவிட்டாா்.