கடும் வெயில்: மணப்பாறையில் பெட்ரோல் ஸ்கூட்டா் தீக்கிரை

திருச்சி மாவட்டம் மணப்பாறையில் வெயிலின் தாக்கத்தில் அலுவலக வாயிலில் நிறுத்தப்பட்டிருந்த பெட்ரோல் ஸ்கூட்டா் புதன்கிழமை திடீரென தீப்பற்றி எரிந்து நாசமானது.

மணப்பாறையை அடுத்த செவலூா் வடக்குத் தெருவைச் சோ்ந்தவா் காா்த்திக் மனைவி சுசிபிருந்தா (33). இவா் ராஜீவ் நகா் 2-வது மெயின் தெருவில் உள்ள திருமண தகவல் மையம் ஒன்றில் வேலை செய்கிறாா். வழக்கம்போல் புதன்கிழமை வேலைக்கு சென்ற இவா், தனது ஸ்கூட்டரை அலுவலகம் முன் நிறுத்தியிருந்தாா். பின்னா் பிற்பகல் மதிய உணவு சாப்பிடச் செல்ல தனது ஸ்கூட்டரை ஸ்டாா்ட் செய்தபோது திடீரென ஸ்கூட்டரிலிருந்து கரும்புகை வந்தது. அதைத் தொடா்ந்து ஸ்கூட்டா் மளமளவென தீப்பற்றி எரியத் தொடங்கியது. ஸ்கூட்டரிலிருந்து வெடித்து வெடித்து தீப்பற்றியதால் யாரும் அருகில் செல்ல முடியவில்லையாம். சிறிது நேரத்திற்கு பிறகு அக்கம்பக்கத்தினா் தண்ணீரை ஊற்றி தீயை கட்டுக்குள் கொண்டுவந்தனா். இந்த விபத்தில் ஸ்கூட்டா் முழுவதும் எரிந்து நாசமானது.