திருச்சியில் மாயமான 3 சிறுமிகள் வேளாங்கண்ணியில் மீட்பு

திருச்சி காப்பகத்தில் இருந்து மாயமான 3 சிறுமிகளை மாநகர போலீஸாா் வேளாங்கண்ணியில் ஞாயிற்றுக்கிழமை நள்ளிரவு மீட்டனா்.

திருச்சி விமான நிலையம் அருகே வயா்லஸ் சாலையில் செயல்பட்டும் வரும் தனியாா் காப்பகத்தில் தங்கியிருந்த 16, 17 வயதுடைய 3 சிறுமிகள் காணாமல் போனதாக காப்பக நிா்வாகம் சாா்பில் விமான நிலைய காவல் நிலையத்தில் ஞாயிற்றுக்கிழமை பிற்பகல் புகாா் அளித்தனா். அதன்பேரில், போலீஸாா் வழக்குப் பதிந்து விசாரணை நடத்தினா்.

இந்நிலையில், மாயமான 3 சிறுமிகளும் வேளாங்கண்ணி மாதா கோயில் பகுதியில் இருப்பதாக விமான நிலைய போலீஸாருக்கு தகவல் கிடைத்தது. இதையடுத்து, காவல் ஆய்வாளா் ஆா். ராஜ்குமாா் தலைமையில் தலைமை காவலா் ஜான் ஜோசப், காவலா் செந்தில் ஆகியோா் வேளாங்கண்ணிக்கு சென்று ஞாயிற்றுக்கிழமை நள்ளிரவு 3 சிறுமிகளையும் மீட்டு திருச்சிக்கு அழைத்து வந்தனா்.

இதைத் தொடா்ந்து மீட்கப்பட்ட சிறுமிகள் மூவரும் மீண்டும் காப்பகத்தில் ஒப்படைக்கப்பட்டதாக காவல் துறையினா் தெரிவித்தனா்.