விழுப்புரத்தில் இன்று அரசு, கட்சி நிகழ்வுகளில் துணை முதல்வா் பங்கேற்பு

விழுப்புரத்தில் சனிக்கிழமை நடைபெறும் அரசு மற்றும் கட்சி நிகழ்வுகளில் துணை முதல்வரும், திமுக இளைஞரணிச் செயலருமான உதயநிதி ஸ்டாலின் பங்கேற்கிறாா்.

திருவண்ணாமலை மாவட்ட நிகழ்வுகளை முடித்துக் கொண்டு , விழுப்புரம் மாவட்டம், செஞ்சியில் நடைபெறும் சட்டப்பேரவைத் தொகுதி நிா்வாகிகள் ஆலோசனைக் கூட்டத்தில் பங்கேற்க வந்த துணை முதல்வா் உதயநிதி ஸ்டாலினுக்கு வடக்கு மாவட்டச் செயலரும், எம்.எல்.ஏ.வுமான செஞ்சி கே.எஸ். மஸ்தான் தலைமையில் வரவேற்பு அளிக்கப்பட்டது.

இதுபோன்று மாவட்ட நிா்வாகம் சாா்பில் கூடுதல் ஆட்சியா் ஜெ.இ.பத்மஜா தலைமையில் வரவேற்பு அளிக்கப்பட்டது. தொடா்ந்து கூட்டத்தில் பங்கேற்று பேசிய உதயநிதி ஸ்டாலின், விழுப்புரம் வந்தடைந்தாா்.

சனிக்கிழமை (டிச.6) காலை விழுப்புரம் அரசு சட்டக் கல்லூரியில் நடைபெறும் விழாவில் நலத்திட்ட உதவிகளை வழங்கிப் பேசும் துணை முதல்வா் உதயநிதி ஸ்டாலின், அண்ணல் அம்பேத்கா் நினைவு நாளையொட்டி அவரது உருவப்படத்துக்கு மலா்தூவி அஞ்சலி செலுத்த உள்ளாா்.

இதைத் தொடா்ந்து விழுப்புரம் கலைஞா் அறிவாலயம் செல்லும் துணை முதல்வா், அங்கு விழுப்புரம் தொகுதி நிா்வாகிகள் ஆலோசனைக் கூட்டத்தில் பங்கேற்று பேசுகிறாா். மதிய உணவுக்குப்பின்னா் ஓய்வெடுக்கும் அவா், மாலை 4 மணிக்குப் புறப்பட்டு, தெற்கு மாவட்ட திமுக சாா்பில் விக்கிரவாண்டி தொகுதிக்குள்பட்ட சிந்தாமணி பகுதியில் நிறுவப்பட்டுள்ள முன்னாள் முதல்வா் மு.கருணாநிதி சிலையைத் திறந்து வைக்கிறாா்.

இதன் பின்னா், விக்கிரவாண்டியிலுள்ள சூா்யா பொறியியல் கல்லூரி வளாகத்தில் நடைபெறும் தொகுதி நிா்வாகிகள் ஆலோசனைக் கூட்டத்தில் பங்கேற்று பேசுகிறாா்.

சிறப்பு ஏற்பாடுகள்: தமிழக துணை முதல்வா் உதயநிதி ஸ்டாலினை வரவேற்பதற்காக விழுப்புரம் நகரத்தின் பல்வேறு பகுதிகளில் பிரம்மாண்ட கொடிக் கம்பங்கள் நடப்பட்டுள்ளன. இதுபோன்று வாழை மரங்களும் கட்டப்பட்டுள்ளன. இதுபோன்று சிந்தாமணியில் கருணாநிதி சிலைத் திறப்பு விழா நடைபெறும் பகுதியிலும், ஆலோசனைக் கூட்டம் நடைபெறும் விக்கிரவாண்டி மற்றும் சுற்றுப்புறப் பகுதிகளிலும் ஏற்பாடுகள் செய்யப்பட்டுள்ளன.

திமுக துணைப் பொதுச் செயலா் க.பொன்முடி, மாவட்டப் பொறுப்பாளா்கள் ரா. லட்சுமணன் (விழுப்புரம் மத்திய), பொன்.கெளதமசிகாமணி (தெற்கு) ஆகியோா் தலைமையில் நிா்வாகிகள் விழா ஏற்பாடுகளை செய்துள்ளனா்.

நடைப்பயிற்சி பூங்காவில் தூய்மைப்பணி: சனிக்கிழமை காலை துணை முதல்வா் உதயநிதி ஸ்டாலின், நடைப்பயிற்சி செல்வாா் எனக் கூறப்படும் நிலையில், மாவட்ட ஆட்சியரகப் பெருந்திட்ட வளாகத்திலுள்ள நடைப்பயிற்சிப் பூங்காவை தூய்மை செய்யும் பணி வெள்ளிக்கிழமை நடைபெற்றது. விழுப்புரம், கோட்டக்குப்பம், திண்டிவனம் நகராட்சிகள், திருவெண்ணெய்நல்லூா், அரகண்டநல்லூா், வளவனூா் பேரூராட்சிகளின் தூய்மைப் பணியாளா்கள் சுமாா் 500 போ் இதற்கான பணியில் ஈடுபட்டனா். விழுப்புரம் நகா்மன்றத் தலைவா் தமிழ்ச்செல்விபிரபு, ஆணையா் எம்.ஆா்.வசந்தி உள்ளிட்டோா் இப்பணியைக் கண்காணித்தனா்.

மேலும், விழா நடைபெறும் பகுதிகளில் போலீஸ் பாதுகாப்பும் அதிகரிக்கப்பட்டுள்ளது.