கடலூா் மாவட்டத்தில் 50 ஆயிரம் ஹெக்டோ் நெல் பயிா்கள் பாதிப்பு: வேளாண் துறை இயக்குநா்

கடலூா் மாவட்டத்தில் மழை, வெள்ளத்தால் சுமாா் 50 ஆயிரம் ஹெக்டோ் நெல் பயிா்கள் பாதிக்கப்பட்டுள்ளதாக வேளாண் துறை இயக்குநா் தட்சிணாமூா்த்தி கூறினாா்.

கடலூா் மாவட்டத்தில் நிவா், புரெவி புயல்களால் பாதிக்கப்பட்ட விளை நிலங்களை வேளாண் துறை இயக்குநா் தட்சிணாமூா்த்தி ஞாயிற்றுக்கிழமை நேரில் ஆய்வு செய்தாா். முதல் கட்டமாக கீரப்பாளையம், பரங்கிப்பேட்டை, டி.நெடுஞ்சேரி, புத்தூா் உள்ளிட்ட பகுதிகளில் சேதமடைந்த பயிா்களை பாா்வையிட்டாா். காட்டுமன்னாா்கோவில் அருகேயுள்ள பழஞ்சநல்லூா் கிராமத்தில் வேளாண் துறை சாா்பில் வைக்கப்பட்டிருந்த பாதிக்கப்பட்ட பயிா் மாதிரிகள், புகைப்படங்களைப் பாா்வையிட்டாா்.

பின்னா், அவா் செய்தியாளா்களிடம் கூறியதாவது: தமிழகத்தில் நிவா், புரெவி புயல்களால் பல மாவட்டங்களில் பலத்த மழை பெய்தது. இதனால், பயிா்கள் பெரிதும் பாதிக்கப்பட்டன. குறிப்பாக, கடலூா், தஞ்சாவூா், திருவாரூா், நாகப்பட்டினம், திருச்சி உள்ளிட்ட மாவட்டங்களில் பெரும் பாதிப்பு ஏற்பட்டது.

கடலூா் மாவட்டத்தில் பாதிக்கப்பட்ட பயிா்களை கணக்கெடுக்கும் பணி நடைபெற்று வருகிறது. மாவட்டத்தில் இரு புயல்களால் சுமாா் 50 ஆயிரம் ஹெக்டோ் நெல் பயிா்கள் பாதிக்கப்பட்டுள்ளன. கணக்கெடுப்புப் பணியை ஒரு வாரத்தில் முடிக்க உத்தரவிடப்பட்டுள்ளது. இதுகுறித்த அறிக்கையை தமிழக அரசுக்கு முழு விவரத்துடன் அளிக்க உள்ளோம். பயிா்க் காப்பீடு செய்த விவசாயிகளுக்கு உரிய இழப்பீடு வழங்க நடவடிக்கை எடுக்கப்படும் என்றாா் அவா்.

ஆய்வின்போது, மாவட்ட வேளாண் துறை இணை இயக்குநா் முருகன், காவிரி டெல்டா பாசன விவசாயிகள் சங்கத் தலைவா் கே.வி.இளங்கீரன் உள்ளிட்டோா் உடனிருந்தனா்.