கடலூரில் மாநகராட்சியில் உள்கட்டமைப்பு வசதிகள் மேம்படுத்தப்படும்: அமைச்சா் எம்.ஆா்.கே.பன்னீா் செல்வம்

நெய்வேலி: கடலூா் மாநகராட்சியில் தேவையான உள்கட்டமைப்பு வசதிகள் மேம்படுத்தப்படும் என வேளாண், உழவா் நலத்துறை அமைச்சா் எம்.ஆா்.கே.பன்னீா்செல்வம் திங்கள்கிழமை தெரிவித்தாா். கடலூா் மாவட்டம் ஆல்பேட்டையில் புதிதாக அமைக்கப்பட்ட கடலூா் சதுக்கம் திறப்பு விழா திங்கள்கிழமை மாலை நடைபெற்றது. ஆட்சியா் அ.அருண் தம்புராஜ் முன்னிலையில், அமைச்சா் எம்.ஆா்.கே.பன்னீா்செல்வம் தலைமை வகித்து, சதுக்கத்தையும், முக்கிய சாலைகளின் மையக்கட்டையில் ரூ.63.50 லட்சத்தில் அமைக்கப்பட்ட 186 மின் விளக்குகளையும் தொடங்கி வைத்தாா்.

நிகழ்வில் அமைச்சா் பேசியதாவது: தமிழக மக்களுக்காக முதல்வா் மு.க.ஸ்டாலின் பல்வேறு திட்டங்களை அறிவித்து செயல்படுத்தி வருகிறாா். அதன்படி, கடலூா் மாநகராட்சி பகுதிகளில் மாநில நகர உள்கட்டமைப்பு மேம்பாட்டு நிதி திட்டத்தின் கீழ் ரூ.1.88 கோடியில் 1,287 புதிய தெரு மின் விளக்குகள் அமைக்க உத்தரவிடப்பட்டது. இதன் ஒரு பகுதியாக ரூ.63.50 லட்சத்தில் நெல்லிக்குப்பம் பிரதான சாலை, திருப்பாதிரிப்புலியூா் இம்பீரியல் சாலை மற்றும் கடலூா் துறைமுகம் இம்பீரியல் சாலைகளில் மையப் பகுதிகளில் அமைக்கப்பட்ட மின்விளக்குகள், கடலூா் சதுக்கம் ஆகியவை திங்கள்கிழமை திறந்து வைக்கப்பட்டன. கடலூா் மாநகராட்சிக்குள்பட்ட அனைத்து பகுதிகளிலும் தேவையான உள்கட்டமைப்பு வசதிகள் மேம்படுத்தப்படும். ரூ.133.18 கோடியில் விடுபட்ட பகுதிகளில் பாதாள சாக்கடை திட்டத்தை முழுமையாக செயல்படுத்தும் பணி, ரூ.26.56 கோடியில் சுத்திகரிப்பு நிலையம் அமைக்கும் பணி ஆகியவை நடைபெற்று வருகிறது. மேலும், வரும் நிதியாண்டில் மாணவா்கள், பொதுமக்கள் கலை நிகழ்ச்சி நடத்துவதற்கு ஏதுவாக மாநகராட்சி பகுதியில் உள்ள நகர அரங்கம் சீரமைக்கப்படும். பொதுமக்கள் நடைப்பயிற்சி மேற்கொள்வதற்காக வெள்ளிக்கடற்கரை சாலை பகுதியில் நடைபாதை அமைக்கவும், மஞ்சக்குப்பம் மணிகூண்டு, பூங்காக்களை மேம்படுத்தவும் திட்டமிடப்பட்டுள்ளது என்றாா். நிகழ்ச்சியில், அரசுத்துறை அதிகாரிகள், உள்ளாட்சித்துறை பிரதிநிதிகள் கலந்து கொண்டனா்.