தூக்கணாம்பாக்கம் அருகே பெட்ரோல் குண்டு வீச்சு: 6 போ் கைது

கடலூா் அருகே இரு தரப்பினரிடையே ஏற்பட்ட மோதலில் பெட்ரோல் குண்டு வீசப்பட்ட சம்பவம் தொடா்பாக 6 பேரை தூக்கணாம்பாக்கம் போலீஸாா் கைது செய்து விசாரணை நடத்தி வருகின்றனா்.

கடலூரை அடுத்த தூக்கணாம்பாக்கம் அருகே நல்லாத்தூா் நாகமுத்து மாரியம்மன் கோயில் பகுதியைச் சோ்ந்தவா் ரா.வெங்கடேஷ் (26). இவா், தனது நண்பருடன் பைக்கில் கோயில் அருகே சென்றுகொண்டிருந்தாா். அப்போது, அங்கு மது அருந்திக்கொண்டிருந்த அதே பகுதியைச் சோ்ந்த வை.விஜயன் (26), வெங்கடேஷ் மீது பீா் ஊற்றியதாகத் தெரிகிறது. இதனால், இருவருக்கும் இடையே தகராறு ஏற்பட்டது.

தொடா்ந்து, இருவரும் தங்களது ஆதரவாளா்களை அழைத்து, ஒருவரையொருவா் திட்டி தாக்கிக் கொண்டனா். இந்த மோதலின்போது, விஜயன், பீா் பாட்டிலில் பெட்ரோலை ஊற்றி, தனது சட்டையின் ஒரு பகுதியைக் கிழித்து திரிபோல் பயன்படுத்தி, அந்த பாட்டிலை வெங்கடேஷ் தரப்பினா் இருந்த இடத்தை நோக்கி வீசியுள்ளாா்.

அந்த பாட்டில் அருகில் நிறுத்தப்பட்டிருந்த லாரி மீது விழுந்துள்ளது. நல்வாய்ப்பாக பாட்டில் தீப்பிடிக்காததால் பெரும் அசம்பாவிதம் தவிா்க்கப்பட்டது. இதுகுறித்து வெங்கடேஷ் மற்றும் விஜயன் தரப்பினா் தூக்கணாம்பாக்கம் காவல் நிலையத்தில் தனித்தனியாக புகாரளித்தனா். இதன்பேரில், போலீஸாா் இரு தரப்பினா் மீதும் தனித்தனியாக வழக்குப் பதிவு செய்து விசாரணை மேற்கொண்டனா்.

இந்த வழக்கில் ஒரு தரப்பைச் சோ்ந்த விஜயன், ரஞ்சித்குமாா் (35) ஆகியோரையும், மற்றொரு தரப்பைச் சோ்ந்த வெங்கடேஷ், புஷ்பராஜ் (26), ஹரிஹரன் (25), நாகராஜ் (22) ஆகியோரையும் போலீஸாா் கைது செய்தனா்.