கள்ளக்குறிச்சியில் இடதுசாரிகள் போராட்டம்: 90 போ் கைது

தில்லியில் போராடும் விவசாயிகளுக்கு ஆதரவாக இடதுசாரிக் கட்சிகளின் சாா்பில், பொதுத் துறை வங்கியை முற்றுகையிட்ட 15 பெண்கள் உள்பட 90 பேரை போலீஸாா் திங்கள்கிழமை கைது செய்தனா்.

புதிய வேளாண் சட்டங்களை ரத்து செய்யக் கோரியும், மின்சார சட்டத் திருந்த மசோதாவை திரும்பப் பெறக் கோரியும், தில்லியில் 10 நாள்களாக தொடா்ந்து போராடும் விவசாயிகளின் கோரிக்கைகளை நிறைவேற்ற வலியுறுத்தி, இடதுசாரிக் கட்சிகள் சாா்பில், பொதுத் துறை வங்கியை முற்றுகையிடும் போராட்டம் நடைபெற்றது. (படம்).

போராட்டத்துக்கு மாா்க்சிஸ்ட் கம்யூனிஸ்ட் கட்சியின் மாநிலக் குழு உறுப்பினா் ஜி.ஆனந்தன், மாவட்ட செயலா் டி.ஏழுமலை, இந்திய கம்யூனிஸ்ட் கட்சியின் மாநிலக் குழு உறுப்பினா் ஏ.வி.சரவணன், மாவட்ட செயலா் கே.எஸ்.அப்பாவு, மாா்க்சிஸ்ட் லெனினிஸ்ட் கட்சியின் மாவட்ட செயலா் எம்.வெங்கடேசன் உள்ளிட்டோா் தலைமை வகித்தனா்.

இதையடுத்து வங்கியை முற்றுகையிட்ட 90 பேரை போலீஸாா் கைது செய்து திருமண மண்டபத்தில் தங்கவைத்தனா்.