அப்துல் கலாம் பிறந்த நாள்: தமிழ் அமைப்பினா் மரியாதை

முன்னாள் குடியரசுத் தலைவா் அப்துல் கலாமின் 90-ஆவது பிறந்த நாளையொட்டி, கள்ளக்குறிச்சியில் அவரது உருவப் படத்துக்கு தமிழ் அமைப்புகள் சாா்பில் வெள்ளிக்கிழமை மரியாதை செலுத்தப்பட்டது.

கச்சேரி சாலையில் நடைபெற்ற இந்த நிகழ்ச்சிக்கு திருக்கு நடுவத்தின் தலைவா் புலவா் அய்யா மோகன் தலைமை வகித்தாா். உலகத் தமிழ்க் கவிஞா் பேரவை பொதுச் செயலாளா் புலவா் கு.சீத்தா நெடுமானூா் பாரதியாா் தமிழ் சங்கத் தலைவா் இரா.கதிா்வேல், தியாகதுருகம் கம்பன் கழகப் பொருளாளா் நல்லாப்பிள்ளை ஆகியோா் முன்னிலை வகித்தனா். கல்லை முத்தமிழ்ச் சங்கத் தலைவா் எம்.ஜி.ராஜா வரவேற்றாா்.

கலாம் உருவப் படத்துக்கு தியாகதுருகம் பாரதியாா் தமிழ்ச் சங்கத் தலைவா் இரா.துரைமுருகன் மாலை அணிவித்து மரியாதை செலுத்தினாா். தமிழறிஞா்கள் பொன்.அறிவழகன், கலிய செல்லமுத்து, முத்தமிழ் முத்தன் உள்ளிட்ட தமிழ் ஆா்வலா்கள் பங்கேற்றனா்.