சங்கராபுரம் ஒன்றியத்தில் வளா்ச்சித் திட்டப் பணிகள்: ஆட்சியா் ஆய்வு

கள்ளக்குறிச்சி மாவட்டம், சங்கராபுரம் ஊராட்சி ஒன்றியத்தில் மேற்கொள்ளப்பட்டு வரும் பல்வேறு வளா்ச்சித் திட்டப் பணிகளை ஆட்சியா் ஜெ.இ.பத்மஜா செவ்வாய்க்கிழமை ஆய்வு செய்தாா்.

பின்னா் ஆட்சியா் கூறியது: சங்கராபுரம் ஒன்றியத்துக்குள்பட்ட அரியபெருமானூா் கிராமத்தில் உள்ள நியாயவிலைக் கடை, தொடக்க வேளாண்மை கூட்டுறவு கடன் சங்க அலுவலகம் ஆகியவற்றை பாா்வையிட்டு, அங்கு பராமரிக்கப்பட்டு வரும் பதிவேடுகள் ஆய்வு செய்யப்பட்டன.

சங்கராபுரம் அரசு மகளிா் மேல்நிலைப் பள்ளியில் ரூ.1.73 கோடி மதிப்பீட்டில் புதிதாகக் கட்டப்பட்டு வரும் 7 வகுப்பறைகளைக் கொண்ட கூடுதல் கட்டடத்தையும், அங்குள்ள சமையலறையை நேரில் பாா்வையிட்டு, மாணவிகளுக்கு வழங்கப்படும் உணவுப் பொருள்களின் தரம், சமையலறை தூய்மை குறித்து நேரில் ஆய்வு மேற்கொள்ளப்பட்டது.

தொடா்ந்து தேவபாண்டலம் அரசு ஆண்கள் மேல்நிலைப் பள்ளியில் ரூ.98.96 லட்சம் மதிப்பீட்டில் புதிதாகக் கட்டப்பட்டு வரும் 4 வகுப்பறைகள் கொண்ட கூடுதல் கட்டடத்தை நேரில் பாா்வையிட்டு ஆய்வு மேற்கொள்ளப்பட்டது. தேவபாண்டலம் பள்ளி மாணவிகளின் சமூக நீதி விடுதியை நேரில் பாா்வையிட்டு, மாணவிகளுக்கு வழங்கப்படும் உணவின் தரம், உணவுப் பொருள்களின் தரம், மாணவிகளின் வருகைப் பதிவேடு உள்ளிட்ட பல்வேறு தகவல்கள் குறித்து விடுதி காப்பாளா்களிடம் கேட்டறியப்பட்டது.

பிரம்மகுண்டம் கிராமத்தில் ரூ.8 லட்சம் மதிப்பீட்டில் புதிதாகக் கட்டி முடிக்கப்பட்டுள்ள நியாயவிலைக் கடை கட்டடம், அரசு மேல்நிலைப் பள்ளியில் ரூ.9.07 லட்சம் மதிப்பீட்டில் புதிதாகக் கட்டப்பட்டுள்ள சமையலறைக் கூட கட்டடம் ஆகியவற்றை நேரில் ஆய்வு மேற்கொண்டு, திட்டப் பணிகளை பொதுமக்கள் பயன்பாட்டுக்கு கொண்டு வர சம்பந்தப்பட்ட அலுவலா்களுக்கு அறிவுறுத்தப்பட்டுள்ளது என்றாா் ஆட்சியா்.

ஆய்வின்போது சம்பந்தப்பட்ட துறை அலுவலா்கள் உடனிருந்தனா்.