புதுவை காங்கிரஸ் எம்எல்ஏவுக்கு கரோனா தொற்று

புதுவை காங்கிரஸ் எம்எல்ஏ க.லட்சுமி நாராயணனுக்கு கரோனா தொற்று உறுதி செய்யப்பட்ட நிலையில், அவா் சென்னை தனியாா் மருத்துவமனையில் அனுமதிக்கப்பட்டாா்.

புதுவை ராஜ்பவன் தொகுதி எம்எல்ஏவாகப் பதவி வகிப்பவா் க.லட்சுமி நாராயணன். முதல்வரின் நாடாளுமன்றச் செயலரான இவருக்கு கடந்த சில நாள்களாக சளி, இருமல், காய்ச்சல் உள்ளிட்ட அறிகுறிகள் தென்பட்டன.

இதையடுத்து, அவருக்கு பரிசோதனை மேற்கொள்ளப்பட்டதில், திங்கள்கிழமை கரோனா தொற்று உறுதி செய்யப்பட்டது. இதைத் தொடா்ந்து, அவா் சென்னையில் உள்ள தனியாா் மருத்துவமனையில் அனுமதிக்கப்பட்டு சிகிச்சை பெற்று வருகிறாா்.

ஏற்கெனவே, அமைச்சா்கள் ஆா்.கமலக்கண்ணன், மு.கந்தசாமி, எம்எல்ஏக்கள் என்எஸ்ஜெ.ஜெயபால், அனந்தராமன், பாஸ்கா், இரா.சிவா, வெங்கடேசன், ஜெயமூா்த்தி ஆகியோா் கரோனாவால் பாதிக்கப்பட்டு, சிகிச்சை முடிந்து வீடு திரும்பினா். கடந்த 2 மாதங்களாக எந்த எம்எல்ஏவும் கரோனா தொற்றால் பாதிக்கப்படாத நிலையில், தற்போது காங்கிரஸ் எம்எல்ஏ லட்சுமி நாராயணனுக்கு கரோனா பாதிப்பு உறுதி செய்யப்பட்டது. இதையடுத்து, அவா் திங்கள்கிழமை நடைபெற்ற சட்டப்பேரவை சிறப்புக் கூட்டத்தில் பங்கேற்கவில்லை.

மேலும் 23 பேருக்கு கரோனா; முதியவா் பலி: இதனிடையே, திங்கள்கிழமை புதுவையில் மேலும் 23 பேருக்கு கரோனா தொற்று உறுதி செய்யப்பட்டது. முதியவா் ஒருவா் பலியானாா்.

புதுவை மாநிலத்தில் திங்கள்கிழமை வெளியான பரிசோதனை முடிவுகளின்படி, புதுச்சேரியில் 7 பேருக்கும், காரைக்காலில் 3 பேருக்கும், மாஹேயில் 13 பேருக்கும் என மேலும் 23 பேருக்கு கரோனா தொற்று உறுதி செய்யப்பட்டது. ஏனாமில் யாருக்கும் தொற்று உறுதி செய்யப்படவில்லை. இதையடுத்து, மாநிலத்தில் கரோனாவால் பாதிக்கப்பட்டோா் எண்ணிக்கை 38,669-ஆக உயா்ந்தது.

தற்போது 286 போ் சிகிச்சையில் உள்ளனா். திங்கள்கிழமை 20 குணமடைந்து வீடு திரும்பியதால், குணமடைந்தோா் எண்ணிக்கை 37,740-ஆக அதிகரித்தது.

இதனிடையே, கரோனா தொற்றால் பாதிக்கப்பட்ட புதுச்சேரி ஈஸ்வரன் கோவில் தெருவைச் சோ்ந்த 64 வயதானவா், இந்திரா காந்தி அரசு மருத்துவக் கல்லூரி மருத்துவமனையில் உயிரிழந்தாா். இதையடுத்து, கரோனாவுக்கு பலியானோா் எண்ணிக்கை 643-ஆக அதிகரித்தது.