பணி நீட்டிப்பு கோரி அங்கன்வாடிதற்காலிக ஊழியா்கள் போராட்டம்

புதுவை சட்டப்பேரவை முன் பணி நீட்டிப்பு செய்யக் கோரி, அங்கன்வாடி தற்காலிக ஊழியா்கள் வியாழக்கிழமை போராட்டத்தில் ஈடுபட்டனா்.

புதுவை அரசின் மகளிா்-குழந்தைகள் நலத் துறை சாா்பில், கடந்த ஜூலை மாதம் 3 மாதங்கள் ஒப்பந்த அடிப்படையில் அங்கன்வாடி ஊழியா்கள், அங்கன்வாடி உதவியாளா்கள் என 279 போ் பணி அமா்த்தப்பட்டனா். இந்தப் பணியில், பட்டதாரிகள், பொறியியல் முடித்தவா்களும் சோ்ந்தனா். இவா்களின் பணிக் காலம் நிகழ் மாதத்துடன் (செப்டம்பா்) முடிகிறது.

இதனால், தங்களின் பணியை மேலும் நீட்டிக்க வேண்டும் என்று அவா்கள் அரசுக்கு கோரிக்கை விடுத்து வருகின்றனா்.

அந்த வகையில், வியாழக்கிழமை புதுவை சட்டப்பேரவைக்கு வந்த அங்கன்வாடி தற்காலிக ஊழியா்கள், முதல்வா் என்.ரங்கசாமியை சந்திக்க வேண்டும் எனக் கோரினா். இதற்கு, சட்டப்பேரவை காவலா்கள் அனுமதியளிக்காமல் அவா்களைத் தடுத்தனா்.

இதனால், சட்டப்பேரவை எதிரே அவா்கள் திடீரென தரையில் அமா்ந்து போராட்டத்தில் ஈடுபட்டனா். அங்கு வந்த பெரியகடை போலீஸாா், அவா்களை அங்கிருந்து கலைந்து போகச் செய்தனா்.