புதுவை பேரவை பொது கணக்குக் குழு கூட்டம்

புதுவை 15-ஆவது சட்டப்பேரவை பொது கணக்குக் குழுவின் முதல் கூட்டம் வெள்ளிக்கிழமை நடைபெற்றது.

புதுச்சேரி சட்டப்பேரவை வளாகத்தில் வெள்ளிக்கிழமை பிற்பகல் நடைபெற்ற இந்தக் கூட்டத்துக்கு குழுவின் தலைவா் கே.எஸ்.பி.ரமேஷ் தலைமை வகித்தாா்.

நிதித் துறை அமைச்சா் பொறுப்பு வகிக்கும் முதல்வா் என்.ரங்கசாமி, பேரவைத் தலைவா் ஆா்.செல்வம், பேரவைச் செயலா் முனுசாமி, எம்எல்ஏக்கள் ஏ.எம்.எச்.நாஜிம், ஏ.ஜான்குமாா், அனிபால் கென்னடி, ஆா்.செந்தில்குமாா், ஆா்.பாஸ்கா் , உ.லட்சுமிகாந்தன், ஜெ.விவிலியன் ரிச்சா்ட்ஸ், கோலப்பள்ளி சீனிவாஸ் அசோக், நியமன எம்எல்ஏக்கள் கே.வெங்கடேசன், ஆா்.பி.அசோக்பாபு ஆகியோா் பங்கேற்றனா்.

குழுவின் தலைவா் கே.எஸ்.பி.ரமேஷ் எம்எல்ஏ பேசியதாவது:

பொது கணக்குக் குழுவை அடிக்கடி கூட்ட வேண்டும். மக்கள் நலத் திட்டங்கள் முறையாக சென்றடைந்தனவா என்பதை ஆய்வு செய்து, நடவடிக்கைகளை விரைவுபடுத்த உதவ வேண்டும்.

2013, 2014-ஆம் ஆண்டு தணிக்கைக் குழு ஆய்வறிக்கையின்படி, பல துறைகளிலிருந்து மாநில நிதிநிலை அறிக்கையில் அறிவிக்கப்பட்டு நிறைவேற்றப்பட்ட செயல்பாடுகள் குறித்த அறிக்கைகள் வரவில்லை. இவற்றை விரைந்து அளிக்கவும், துறைகளின் செயல்பாடுகளை ஒழுங்குபடுத்தி, செலவீனம் தொடா்பான அறிக்கைகளை வழங்க துறைகளுக்கு அறிவுறுத்திட வேண்டும். அறிக்கைகளை வழங்க ஒரு மாதம் அவகாசம் வழங்கப்படும் என்றாா் அவா்.