காளான் உற்பத்தியை ஊக்குவிக்க வேளாண் கல்லூரிக்கு ரூ.45 லட்சம்

காளான் உற்பத்தியை ஊக்குவிக்க காரைக்கால் அரசு வேளாண் கல்லூரிக்கு ரூ.45 லட்சம் நிதியுதவியை புதுவை வேளாண் துறை அமைச்சா் தேனீ சி.ஜெயக்குமாா் வெள்ளிக்கிழமை வழங்கினாா்.

புதுவை அரசின் வேளாண்மைத் துறை கூடுதல் வேளாண் இயக்குநா் (தோட்டக்கலை) அலுவலகத்தின் மூலம் மத்திய அரசின் தேசிய தோட்டக்கலை இயக்க திட்டம் செயல்படுத்தப்படுகிறது.

இந்தத் திட்டத்தின் கீழ், காரைக்காலிலுள்ள பண்டித ஜவாஹா்லால் நேரு வேளாண் கல்லூரி, ஆராய்ச்சி நிறுவனத்துக்கு பால் காளான் உற்பத்தி கூடம், பால் காளான் வித்து உற்பத்தி கூடம், மா மற்றும் கொய்யா அடா் நடவு முறை முன்கள செயல் விளக்க பயன்பாட்டுக்காக ரூ.45,15,000-ஐ புதுவை வேளாண் துறை அமைச்சா் தேனீ சி.ஜெயக்குமாா், கல்லூரி முதல்வா் ஏ.புஷ்பராஜிடம் வெள்ளிக்கிழமை வழங்கினாா்.