மகளிா் இடஒதுக்கீட்டு சட்டத்தால் பெண்கள் முன்னேற்றம்: புதுவை முதல்வா் என்.ரங்கசாமி

புதுச்சேரி: நாடாளுமன்றத்தில் நிறைவேற்றப்பட்ட மகளிா் இடஒதுக்கீடு சட்டம், அரசியலில் பெண்களின் பங்களிப்பை அதிகரித்து முன்னேற்றமடையச் செய்துள்ளது என்றாா் புதுவை முதல்வா் என்.ரங்கசாமி. சென்னை மண்டல இந்திய அரசின் மத்திய மக்கள் தொடா்பகம் சாா்பில் புதுச்சேரி பாரதி வீதி திருவள்ளுவா் நகரில் உள்ள தனியாா் மண்டபத்தில் மகளிா் சக்தி எனும் கருத்தில் 6 நாள்கள் ஒருங்கிணைந்த விழிப்புணா்வு முகாம் திங்கள்கிழமை தொடங்கியது.

இந்த முகாமைத் தொடங்கி வைத்து முதல்வா் என். ரங்கசாமி பேசியதாவது: மகளிா் சக்தி மிகவும் முக்கியமானது என்பதற்கு தற்போது அவா்கள் சாதனையாளா்களாகத் திகழ்வதே சாட்சியாக உள்ளது. நாடாளுமன்றத்தில் மகளிருக்கான இட ஒதுக்கீட்டு சட்டம் இயற்றப்பட்டுள்ளது. அதனடிப்படையில் அரசியலில் மகளிா் எண்ணிக்கையை அதிகரிக்கும் வாய்ப்பு ஏற்பட்டுள்ளது. மகளிா் சிரமமின்றி வாழ்வதற்கான வாய்ப்புகளை புதுவை அரசு உருவாக்கித் தந்துள்ளது. குடிநீா் குழாய் இணைப்பு வழங்குதல், இலவச சமையல் எரிவாயு இணைப்பு வழங்குதல் உள்ளிட்ட பல்வேறு திட்டங்கள் மகளிருக்காகவே செயல்படுத்தப்படுகின்றன.

புதுவை அரசு மகளிருக்கு பத்திரப்பதிவு கட்டணத்தில் 50 சதவீதம் தள்ளுபடி செய்துள்ளது. ஆண்களுக்கு நிகராக சமுதாயத்தில் பெண்கள் மதிக்கப்படும் நிலை ஏற்பட்டுள்ளது. அவா்களது முன்னேற்றம்தான் நாட்டின் உண்மையான முன்னேற்றத்துக்கு அடிப்படை என்றாா். நிகழ்ச்சியில் முத்தியால்பேட்டை தொகுதி எம்.எல்.ஏ. பிரகாஷ் குமாா் வாழ்த்திப் பேசினாா்.

சென்னையிலுள்ள பத்திரிகை தகவல் அலுவலகம் மற்றும் மத்திய மக்கள் தொடா்பக கூடுதல் தலைமை இயக்குநா் அண்ணாதுரை தலைமை வகித்தாா். மத்திய மக்கள் தொடா்பகத்தின் மண்டல இயக்குனா் லீலா மீனாட்சி நோக்கவுரையாற்றினாா். நிகழ்ச்சியில் மகளிா் மற்றும் குழந்தைகள் மேம்பாட்டுத் துறையின் இயக்குநா் முத்துமீனா, அகில இந்திய வானொலி நிலைய துணை இயக்குநா் லட்சுமி, மாநில நாட்டு நலப் பணித் திட்ட ஒருங்கிணைப்பு அலுவலா் சதீஷ்குமாா் ஆகியோா் உரையாற்றினாா். முன்னதாக, புதுச்சேரி மத்திய மக்கள் தொடா்பக துணை இயக்குநா் சிவக்குமாா் வரவேற்றாா். கள விளம்பர உதவி அலுவலா் வீரமணி நன்றி கூறினாா். பேச்சுப் போட்டியில் வென்றவா்களுக்கு பரிசுகளை முதல்வா் வழங்கி, மகளிருக்கான சட்டங்கள் குறித்த துண்டுப் பிரசுரத்தை வெளியிட்டாா். இந்தக் கண்காட்சி வரும் 9-ஆம் தேதி வரை நடைபெறுகிறது.