"இயந்திரம் மூலம் நெல் நடவுக்கு அரசு மானியம்'

இயந்திரம் மூலம் நெல் நடவு செய்யும் விவசாயிகள் அரசின் மானியம்  பெறலாம் என ஆட்சியர் எம்.லட்சுமி தெரிவித்தார்.

திருவெண்ணெய்நல்லூர் அருகே காந்தலவாடி கிராமத்தில் சரவணன் என்பவரது வயலில் இயந்திரம் மூலம் நெல் நடவு செய்வதில் நவீன தொழில்நுட்பம் குறித்து செயல் விளக்கம் நடைபெற்றது. இதனை மாவட்ட ஆட்சியர் எம்.லட்சுமி ஆய்வு செய்தார். பின்பு அவர் கூறியது:

மாவட்டத்தில் இந்த ஆண்டு இயந்திரம் மூலம் திருந்திய நெல் சாகுபடி செய்யும் பரப்பினை அதிகரிக்க முடிவுசெய்து, 22,400 ஹெக்டர் இலக்கு நிர்ணயிக்கப்பட்டுள்ளது.

இத் திட்டம் மூலம் அனைத்து வட்டாரங்களிலும் இயந்திர நெல் நடவு செயல்படுத்தப்பட்டு வருகிறது. இத்திட்டத்தில் பாய் நாற்றங்காலில் தயாரிக்கப்பட்ட நெல் நாற்றுகளை இயந்திரம் மூலம் நடவு செய்த விவசாயிகள், அதற்குரிய ஆவணங்களை வட்டார வேளாண்மை விரிவாக்க மையங்களில் சமர்ப்பித்தால் ஒரு ஏக்கருக்கு மானியமாக ரூ.1,200 வீதம் நேரடியாக விவசாயிகளின் வங்கிக் கணக்கில் செலுத்தப்படும். இத் திட்டம் மூலம் ஒரு விவசாயிகளுக்கு அதிகபட்சமாக 5 ஏக்கர் வரை மானியம் வழங்கப்படும் என்றார்.

இதையடுத்து காந்தலவாடி கிராமத்தில் ரவி என்பவரின் வயலில் அமைக்கப்பட்ட பாய் நாற்றங்காலை ஆட்சியர் பார்வையிட்டார்.

உளுந்தூர்பேட்டை: இதேபோல் உளுந்தூர்பேட்டை வட்டாரம் ஆர்.ஆர்.குப்பம் கிராமத்தில் தேசிய வேளாண்மை வளர்ச்சி நெல் இயக்கத் திட்டத்தின் கீழ், இயந்திரம் மூலம் நெல் நடவுப் பணியினை வேளாண்மை இணை இயக்குநர் ஆர்.ரத்தினசபாபதி அண்மையில் ஆய்வு செய்தார்.