மக்கள் தொடர்பு முகாமில் 57 பேருக்கு நலத் திட்ட உதவி

சின்னசேலம் வட்டம், கல்லாநத்தம் கிராமத்தில் வியாழக்கிழமை நடைபெற்ற மக்கள் தொடர்பு முகாமில் 57 பயனாளிகளுக்கு நலத் திட்ட உதவிகள் வழங்கப்பட்டன.
இந்த முகாமுக்கு கள்ளக்குறிச்சி கோட்டாட்சியர் ம.தினேஷ் தலைமை வகித்தார். சமூகப் பாதுகாப்பு நலத் திட்ட தனி வட்டாட்சியர் சு.ராஜராஜன், மண்டல துணை வட்டாட்சியர் ச.ராமமூர்த்தி முன்னிலை வகித்தனர். வட்டாட்சியர் சு.இந்திரா வரவேற்றார்.
கோட்டாட்சியர் ம.தினேஷ் 159 மனுக்களைப் பெற்றார். வருவாய்த் துறை மூலம் முதியோர் உதவித் தொகை 10 பேருக்கு ஒரு லட்சத்து 20ஆயிரமும், வீட்டுமனை ஒப்படை 12 பேருக்கு ரூ.2 லட்சத்து 
2 ஆயிரத்து 800, பட்டாமாற்றம் 17 பேருக்கும், ஸ்மார்ட் குடும்ப அட்டை 18 பேருக்கும் என மொத்தம் 57 பயனாளிகளுக்கு ரூ.3 லட்சத்து 22ஆயிரத்து 800 மதிப்பீட்டில் நலத் திட்ட உதவிகளை கோட்டாட்சியர் ம.தினேஷ் வழங்கினார்.
நிகழ்ச்சியில், வட்டாரக் கல்வி அலுவலர் அ.ராஜசேகரன், உதவி வேளாண்மை தியாகராஜன் உள்ளிட்ட அரசின் சாதனைகள் குறித்து பலரும் பேசினர்.
கூடுதல் வட்டார வளர்ச்சி அலுவலர் மணிமேகலை, பொதுப் பணித் துறை நீர்வள ஆதார அமைப்பு ராஜ்மோகன், சுகாதார மேற்பார்வையாளர் பாபு, அரசுப் போக்குவரத்துக் கழக பணிமனை மேலாளர் மணி, வருவாய் ஆய்வாளர் மணி, கிராம நிர்வாக அலுவலர் ராமர் உள்ளிட்ட பல்வேறு துறைகளைச் சார்ந்த அலுவலர்கள் பங்கேற்றனர்.