திருவள்ளுவர் கலை, அறிவியல் கல்லூரியில் நாளை கலந்தாய்வு தொடக்கம்

கள்ளக்குறிச்சி திருவள்ளுவர் பல்கலைக்கழக (உறுப்பு) கலை, அறிவியல் கல்லூரியில் 2019 - 20ஆம் ஆண்டுக்கான முதலாமாண்டு மாணவர்கள் சேர்க்கைக்கான கலந்தாய்வு கல்லூரி வளாகத்தில் திங்கள்கிழமை (மே 27) தொடங்குகிறது.
இந்தக் கல்லூரியில் பி.ஏ. தமிழ், ஆங்கிலம், பி.காம். வணிகவியல், பி.எஸ்சி. இயற்பியல், வேதியியல், கனிணி அறிவியல், கணிதம் உள்ளிட்ட 7 பிரிவுகள் உள்ளன. இந்தப் பிரிவுகளுக்கு கடந்த 1-ஆம் தேதியிலிருந்து மாணவர்கள் விண்ணப்பித்து வந்தனர்.
இந்த நிலையில், மாணவர்கள் சேர்க்கைக்கான கலந்தாய்வு திங்கள்கிழமை (மே 27) தொடங்குகிறது. அன்றைய தினம் ராணுவ வீரர்களின் பிள்ளைகள், மாற்றுத் திறனாளிகள், விளையாட்டு வீரர்கள் போன்றவர்களுக்கு காலை 10 மணி முதல் 11 மணி வரை கலந்தாய்வு நடைபெறுகிறது.
11 மணிக்கு மேல் இளநிலை அறிவியல் பாடங்களுக்கும், செவ்வாய்க்கிழமை (மே 28) வணிகவியல் பிரிவுக்கும், புதன்கிழமை ( மே 29) இளநிலை தமிழ் பிரிவுக்கும், வியாழக்கிழமை (மே 30) இளநிலை ஆங்கிலம் பிரிவுக்கும், வெள்ளிக்கிழமை ( மே 31) நேரடி சேர்க்கையும் (வராண்டா) நடைபெறுகின்றன என அந்தக் கல்லூரி முதல்வர் மு.முத்துசாமி தெரிவித்தார். மேலும், இளநிலை கலை, அறிவியல் பாடப் பிரிவுகளுக்கு விண்ணப்பித்திருந்த அனைத்து மாணவர்களுக்கும் 10 நாள்களுக்கு முன்பே அழைப்புக் கடிதம் அனுப்பி வைக்கப்பட்டுள்ளது. அழைப்புக் கடிதம் கிடைக்காத மாணவர்களும் கலந்தாய்வில் பங்கேற்கலாம் என கல்லூரியின் முதல்வர் மு.முத்துசாமி தெரிவித்தார்.