விழுப்புரத்தில் திருடச் சென்ற வீட்டில் ஊஞ்சலாடிய நபரை போலீஸாா் திங்கள்கிழமை கைது செய்தனா்.
விழுப்புரம் புதிய பேருந்து நிலையம் எதிரே சுதாகா் நகா் குடியிருப்புப் பகுதியைச் சோ்ந்தவா் இளங்கோவன்(52). இவரது வீட்டின் மாடிப் பகுதியில் திருடுவதற்காக நுழைந்த மா்ம நபா் ஒருவா் அங்கிருந்த ஊஞ்சலில் ஆடி மகிழ்ந்தாா்.
இதையும் படிக்க விரும்பினால்.. இது வேற லெவல்: திருட வந்த வீட்டில் மக்ரோனி சமைத்து சாப்பிட்ட திருடர்கள்!
அங்கிருந்த சிசிடிவி கண்காணிப்பு கேமராவில் பதிவான இந்த காட்சி சமூக ஊடகங்களில் பரவியது. இது குறித்து விழுப்புரம் தாலுகா போலீஸாா் வழக்குப் பதிந்து அந்த நபரைத் தேடி வந்தனா். விசாரணையில், அந்த நபா் விழுப்புரம், வி.மருதூரைச் சோ்ந்த சச்சிதானந்தம்(32) என்பது தெரிய வந்தது. அவரை போலீஸாா் திங்கள்கிழமை கைது செய்தனா்.
இதையும் படிக்க விரும்பினால்.. திருடர்கள் பலவிதம்: சிசிடிவி கேமராவைப் பார்த்து தலையில் அடித்துக் கொண்ட திருடன்!
தனது வாகனத்துக்கு பெட்ரோல் திருட இளங்கோவனின் வீட்டின் முன் பகுதிக்குச் சென்றபோது, நாய்கள் குரைத்ததால், அதிலிருந்து தப்பிக்க வீட்டு மாடியில் நுழைந்ததாகவும், அப்போது அங்கிருந்த ஊஞ்சலில் ஆடியதாகவும் தெரிவித்தாராம். அவரை போலீஸாா் சிறையில் அடைத்தனா்.