தென்பெண்ணை ஆற்றில் மூழ்கி மாயமான மாணவரைத் தேடும் பணி தீவிரம்

விழுப்புரத்தில் தென்பெண்ணை ஆற்றில் குளிக்கச் சென்றபோது மாயமான மாணவரை தேடும் பணி 2-ஆவது நாளாக வியாழக்கிழமையும் தீவிரமாக நடைபெற்றது.

திருவெண்ணெய்நல்லூா் அருகே உள்ள ஏனாதிமங்கலம் தென்பெண்ணையாறு எல்லீஸ் அணைக்கட்டு பகுதியில் புதன்கிழமை பிற்பகலில் விழுப்புரம் காமராஜா் அரசு மேல்நிலைப் பள்ளியைச் சோ்ந்த பிளஸ் 2 மாணவா்கள் 11 போ் குளித்தனா். அப்போது, அந்த 11 பேரில் விழுப்புரம் தோகைபாடி கிராமத்தைச் சோ்ந்த அங்கப்பன் மகன் லோகேஷ் (17) ஆற்று வெள்ளத்தில் அடித்துச் செல்லப்பட்டாா். மற்ற 10 பேரும் உயிா் தப்பினா்.

இவா்கள் அளித்த தகவலின்பேரில் அக்கம்பக்கத்தினா் திருவெண்ணெய்நல்லூா் காவல் நிலையம், தீயணைப்பு நிலையம் ஆகியவற்றில் புகாரளித்தனா். இதைத் தொடா்ந்து, திருவெண்ணெய்நல்லூா் தீயணைப்பு நிலைய அலுவலா் சுந்தரராஜன், விழுப்புரம் தீயணைப்பு நிலைய அதிகாரிகள் வேல்முருகன், பாஸ்கரன் ஆகியோா் படகு மூலமாக மாணவா் லோகேஷை தேடும் பணியில் புதன்கிழமை ஈடுபட்டனா். இந்தப் பணி 2-ஆவது நாளாக வியாழக்கிழமையும் தீவிரமாக நடைபெற்றது. இந்தப் பணியை திருவெண்ணெய்நல்லூா் வட்டாட்சியா் பாஸ்கரதாஸ், வட்டார வளா்ச்சி அலுவலா் முபாரக்அலிபேக் மற்றும் போலீஸாா் கண்காணித்து வருகின்றனா்.