வளமிகு வட்டாரங்கள் திட்டத்தில் ஒருங்கிணைந்து பணியாற்ற வேண்டும்: விழுப்புரம் ஆட்சியா் அறிவுறுத்தல்

வளமிகு வட்டாரங்கள் திட்டத்தின் கீழ், தோ்வு செய்யப்பட்ட திருவெண்ணெய்நல்லூா், மேல்மலையனூா் வட்டங்களின் முன்னேற்றத்துக்கு அனைத்துத்துறைகளும் ஒருங்கிணைந்து பணியாற்ற வேண்டும் என்று ஆட்சியா் சி.பழனி தெரிவித்தாா்.

விழுப்புரம் மாவட்ட ஊரக வளா்ச்சி முகமைக் கூட்டரங்கில் சனிக்கிழமை நடைபெற்ற ஆலோசனைக் கூட்டத்துக்கு தலைமை வகித்து, ஆட்சியா் மேலும் பேசியதாவது: 2023-24 ஆம் ஆண்டு நிதி நிலை அறிக்கையில் வளமிகு வட்டாரங்கள் திட்டத்தை தமிழக நிதி மற்றும் மனிதவள மேம்பாட்டுத்துறை அமைச்சா் அறிவித்தாா். பின்தங்கிய வட்டங்களில் சமூக மற்றும் பொருளாதார அளவீடுகளில் முன்னேற்றம் மற்றும் வளா்ச்சியை அடிப்படையாகக் கொண்டு வளமிகு வட்டாரங்கள் திட்டம் செயல்படுத்தப்படும்.

இந்தத் திட்டத்தில் விழுப்புரம் மாவட்டத்தில் திருவெண்ணெய்நல்லூா், மேல்மலையனூா் உள்ளிட்டவை என மாநிலம் முழுவதும் 50 வட்டங்கள் தோ்வு செய்யப்பட்டுள்ளன. 3 ஆண்டு காலத்துக்கு திட்டம் செயல்படுத்தப்படும். இதற்காக ஒவ்வொரு வட்டத்துக்கும் தலா ரூ.5 கோடி நிதி ஒதுக்கீடு செய்யப்படும். இதுதொடா்பாக, அனைத்துத் துறைகளும் தங்கள் துறைகளைச் சாா்ந்த தரவுகளை வழங்க வேண்டும்.

திருவெண்ணெய்நல்லூா், மேல்மலையனூா் வட்டங்கள் முன்னேற்றமடைய அனைத்துத் துறை அலுவலா்களும் ஒருங்கிணைந்து பணியாற்ற வேண்டும் என்றாா் ஆட்சியா் பழனி.

கூட்டத்தில், மாவட்ட ஊரக வளா்ச்சி முகமைத் திட்டக் கூடுதல் ஆட்சியா் ஸ்ருதஞ் ஜெய் நாராயணன், சென்னை சமூகப்பணிக் கல்லூரி உதவிப் பேராசிரியா்கள் ஜொ்ரி, வசந்த் மற்றும் துறை சாா்ந்த அலுவலா்கள் பங்கேற்றனா்.