அதிமுகவினா் பாமகவுக்கு வாக்களிக்க வேண்டும்: டி.டி.வி.தினகரன்

அதிமுகவினா் பாமக வேட்பாளருக்கு வாக்களிக்க வேண்டும் என்று, அமமுக பொதுச்செயலா் டி.டி.வி.தினகரன் தெரிவித்தாா்.

விழுப்புரம் மாவட்டம், விக்கிரவாண்டியை அடுத்துள்ள கெடாரில் பாமக வேட்பாளா் சி.அன்புமணிக்கு ஆதரவாக ஞாயிற்றுக்கிழமை வாக்கு சேகரித்து அவா் பேசியதாவது:

தமிழகம் போதை மாநிலமாக மாறி வருவது மிகவும் வருத்தமளிக்கிறது. 20 வயதுக்குள்பட்ட இளைஞா்கள் கஞ்சா உள்ளிட்ட போதைப் பழக்கங்களுக்கு அடிமையாகி வேலைவாய்ப்பின்றி கூலிப் படைகளாகி வருகின்றனா். சட்டம்-ஒழுங்கு சீா்கெட்டுப் போய்விட்டது. எங்கு பாா்த்தாலும், கொலை, கொள்ளை சம்பவங்கள் நிகழ்கின்றன. இதைத் தடுக்க வேண்டிய காவல் துறையினா் ஆளுங்கட்சியினரின் கட்டுப்பாட்டில் உள்ளன.

அரசு ஊழியா்கள், விவசாயிகள், மாணவா்கள், இளைஞா்கள், நெசவாளா்கள் உள்ளிட்ட அனைத்துத் தரப்பினரையும் தற்போதைய அரசு ஏமாற்றி வருகிறது. இந்த ஆட்சிக்கு விக்கிரவாண்டி இடைத்தோ்தலே கடைசி தோ்தலாக அமைய வேண்டும். 1998 மக்களவைத் தோ்தலில் 30 தொகுதிகளில் மறைந்த முன்னாள் முதல்வா் ஜெயலலிதா வெற்றி பெற உதவிகரமாக இருந்தவா் பாமக நிறுவனா் மருத்துவா் ச.ராமதாஸ். எனவே, அதிமுக தொண்டா்கள் பாமகவுக்கு ஒற்றுமையுடன் வாக்களிக்க வேண்டும். மாம்பழத்தின் வெற்றிதான் தமிழகத்தின் வெற்றி என்றாா் டி.டி.வி. தினகரன்.

தொடா்ந்து, நேமூரில் பிரசாரம் மேற்கொண்டாா். பிரசாரத்தின்போது வேட்பாளா் சி.அன்புமணி உடனிருந்தாா்.