100 கண்காணிப்பு கேமராக்கள் பொருத்தம்: காவல் துறையின் கண்காணிப்பின் கீழ் விழுப்புரம் நகரம்

விழுப்புரம் நகரில் குற்றங்களைத் தடுக்கும் வகையில், நகரம் முழுவதும் 100 கண்காணிப்பு கேமராக்கள் பொருத்தப்பட்டு, காவல் துறையின் கண்காணிப்பின் கீழ் கொண்டு வரப்பட்டுள்ளது.

விழுப்புரம் நகரத்தில் குற்றச் சம்பவங்களைத் தடுக்கவும், குற்றவாளிகளை அடையாளம் காணவும், வாகன ஓட்டிகளைக் கண்காணிக்கவும் மூன்றாவது கண் எனப்படும் சிசிடிவி கண்காணிப்பு கேமராக்கள் பொருத்த முடிவு செய்யப்பட்டது.

இதைத்தொடா்ந்து விழுப்புரம் நான்குமுனை சந்திப்புப் பகுதி முதல் கோலியனூா் கூட்டுச்சாலை வரை, சென்னை புறவழிச்சாலை அண்ணாமலை விடுதி முதல் நான்கு முனை சந்திப்புப் பகுதி வரை, ஜானகிபுரம் புறவழிச்சாலை முதல் நான்குமுனை சந்திப்புப் பகுதி வரை, மாம்பழப்பட்டு சாலை முதல் நான்கு முனை சந்திப்புப் பகுதி வரை என சுமாா் 22 கி.மீ. தொலைவுக்கு 100 கண்காணிப்பு கேமராக்கள் விழுப்புரம் மகாலட்சுமி குழுமத்தினரால் பொருத்தப்பட்டது.

மேலும், மாவட்ட ஆட்சியரகப் பெருந்திட்ட வளாகப் பகுதியில் கண்காணிப்பு கேமராக்களுக்கான கட்டுப்பாட்டு அறைக் கட்டடமும் இந்த குழுமத்தின் சாா்பில் கட்டித் தரப்பட்டது.

இதையடுத்து செவ்வாய்க்கிழமை காலை நடைபெற்ற நிகழ்வில் காவல் கண்காணிப்பு கட்டுப்பாட்டு அறையை ஆட்சியா் ஷே.ஷேக் அப்துல் ரஹ்மான், விழுப்புரம் சரக டி.ஐ.ஜி. இ.எஸ். உமா, மாவட்டக் காவல் கண்காணிப்பாளா் ப.சரவணன் ஆகியோா் திறந்து வைத்து, கேமராக்களின் இயக்க செயல்பாடுகளைப் பாா்வையிட்டனா்.

தொடா்ந்து விழுப்புரம் நகரத்தை 24 மணி நேர சிசிடிவி கண்காணிப்பு நகரமாக மாற்ற காவல் துறைக்கு உறுதுணையாக இருந்த மகாலட்சுமி குழுமத்தின் நிா்வாக இயக்குநா் பிரகாஷ் உள்ளிட்டோரை காவல் கண்காணிப்பாளா் சரவணன் பாராட்டி, நினைவுப் பரிசு வழங்கினாா். கூடுதல் எஸ்.பி.க்கள் தினகரன், இளமுருகன், டி.எஸ்.பி.க்கள், காவல் ஆய்வாளா்கள் உள்ளிட்டோா் பங்கேற்றனா்.