தாம்பரம் - விழுப்புரம் இடையே பயணிகள் ரயில் பகுதியளவில் 2 நாள்கள் ரத்து

விழுப்புரம் யாா்டில் பராமரிப்புப் பணிகள் மேற்கொள்ளப்படுவதால், ஜன. 25, 26-இல் தாம்பரம்-விழுப்புரம் இடையே பயணிகள் ரயில்கள் பகுதியளவில் ரத்து செய்யப்பட்டுள்ளன.

இதுகுறித்து தெற்கு ரயில்வேயின் திருச்சி கோட்ட மக்கள் தொடா்பு அலுவலகம் வியாழக்கிழமை வெளியிட்ட செய்திக்குறிப்பு:

விழுப்புரம் யாா்டில் பராமரிப்புப் பணிகள் மேற்கொள்ளப்படவுள்ளன. இதனால் தாம்பரத்திலிருந்து காலை 9.45 மணிக்கு விழுப்புரத்துக்குப் புறப்படும் பயணிகள் ரயில்(வ.எண்.66045), ஜனவரி 25, 26-ஆம் தேதிகளில் விக்கிரவாண்டி- விழுப்புரம் இடையே பகுதியளவில் ரத்து செய்யப்பட்டுள்ளது. இதன் காரணமாக இந்த ரயில் தாம்பரத்திலிருந்து விக்கிரவாண்டி வரை மட்டுமே இயக்கப்படும்.

இதுபோன்று, விழுப்புரம் ரயில் நிலையத்திலிருந்து பிற்பகல் 1.40 மணிக்குப் புறப்படும் விழுப்புரம்-சென்னை கடற்கரை பயணிகள் ரயில் (வ.எண்.66046), விழுப்புரம்-விக்கிரவாண்டி இடையே ஜனவரி 25, 26 தேதிகளில் பகுதியளவில் ரத்து செய்யப்பட்டுள்ளது. இதன் காரணமாக இந்த ரயில் விக்கிரவாண்டி ரயில் நிலையத்திலிருந்து பிற்பகல் 1.54 மணிக்குப் புறப்படும் என்று அந்த செய்திக்குறிப்பில் தெரிவிக்கப்பட்டுள்ளது.