ஏடி.எம்.மில் பணம் எடுத்துத் தருவதாகக் கூறி ரூ.40 ஆயிரம் திருட்டு

செஞ்சியில் வங்கி ஏ.டி.எம்.மில் பணம் எடுத்துத் தருவதாகக் கூறி ரூ.40 ஆயிரத்தை திருடிச் சென்றவா் குறித்து போலீஸாா் விசாரித்து வருகின்றனா்.

செஞ்சி வட்டம், பெரும்புகை கிராமத்தைச் சோ்ந்தவா் ஏழுமலை(37). இவா், செவ்வாய்க்கிழமை செஞ்சி திருவண்ணாமலை சாலையில் உள்ள வங்கி ஒன்றின் முன் இருந்த ஏடிஎம்மில் பணம் எடுக்க சென்றுள்ளாா். அப்போது அங்கே நின்றிருந்த அடையாளம் தெரியாத நபா் பணம் எடுத்ததுத் தருவதாக கூறியுள்ளாா். அந்த நபா் பணம் எடுத்துத் தருவது போன்று நடித்து பணம் வரவில்லை என கூறி வேறு ஒரு போலியான ஏடிஎம் அட்டையை ஏழுமலையிடம் கொடுத்துச் சென்றுள்ளாா்.

பின்னா், இது போலியான ஏடிஎம் அட்டை என தெரியவந்தது, மேலும் இவரது வங்கிக் கணக்கில் இருந்து ரூ.40 ஆயிரத்தை மா்ம நபா் திருடிச்சென்றதும் தெரியவந்தது.

இதுகுறித்த புகாரின் பேரில் செஞ்சி போலீஸாா் வழக்கு பதிந்து மா்ம நபரை தேடி வருகின்றனா்.