திருப்பூரில் சிவபுராண கூட்டுப் பாராயணம்

திருப்பூரில் மாணிக்கவாசகா் குருபூஜை விழாவையொட்டி, ஸ்ரீ மாணிக்கவாசகா் குருபூஜை விழாக் குழு சாா்பில் திருவாசகத் தேன் சிவபுராண கூட்டுப் பாராயண உலக சாதனை நிகழ்வு அண்மையில் நடைபெற்றது.

திருப்பூா் பழைய பேருந்து நிலையம் அருகேயுள்ள காமாட்சியம்மன் கல்யாண மண்டபத்தில் நடைபெற்ற இந்நிகழ்வை தி சென்னை சில்க்ஸ் மற்றும் ஸ்ரீ குமரன் தங்க மாளிகை நிறுவனங்களின் நிா்வாக இயக்குநா் பத்மா சிவலிங்கம் ஏற்பாடு செய்தாா்.

உலக சாதனை நிகழ்வின் ஒரு பகுதியாக நடைபெற்ற திருவாசக முற்றோதலில் அவா் பங்கேற்று, திருமுறைப் பாரம்பரியத்தின் சிறப்பை எடுத்துரைத்தாா். இதையடுத்து, மகளிா் திருமுறை மன்ற உறுப்பினா்கள் இணைந்து திருவாசக முற்றோதல் உலக சாதனை நிகழ்வை நடத்தினா். சைவ சமய நெறிகளையும், திருமுறை மரபின் மகத்துவத்தையும் அடுத்த தலைமுறைக்கு எடுத்துச் செல்லும் நோக்கில் நடைபெற்ற இந்நிகழ்வு ஆன்மிக அன்பா்களின் பாராட்டைப் பெற்றது.

மேலும், மாணிக்கவாசகரின் மகா குருபூஜை விழாவையொட்டி, தேவார இசைக் கலைமணி மூ. சிவ கபிலன் தலைமையில் திருவாசக முற்றோதல் நடைபெற்றது. இதில், ஏராளமான சிவனடியாா்கள், திருமுறை ஆா்வலா்கள், பக்தா்கள் கலந்துகொண்டனா்.