கம்பம் கோயிலில் திருமண மண்டபம் கட்டுமானப் பணி தொடக்கம்

தேனி மாவட்டம், கம்பம் கம்பராயப்பெருமாள் காசிவிசுவநாதா் கோயில் வளாகத்தில் ரூ. 3.75 கோடியில் திருமண மண்டபம் கட்டுவதற்கான பணிகளை காணொலி காட்சி மூலம் முதல்வா் மு.க. ஸ்டாலின் சனிக்கிழமை தொடங்கி வைத்தாா்.

இங்கு நடைபெற்ற நிகழ்வில் என். ராமகிருஷ்ணன் எம்.எல்.ஏ., ராமலிங்கம் அறக்கட்டளை நிா்வாகி ஆா். பாஸ்கா், பாலமுத்தழகு குழும தலைவா் பி.எல்.ஏ. ஜெகநாத்மிஸ்ரா, நகா்மன்றத்தலைவி வனிதா நெப்போலியன், மாவட்ட அறங்காவலா் குழு உறுப்பினா்கள் கே.ஆா். ஜெயபாண்டியன், கே.வி.பி. முருகேசன் உள்ளிட்டோா் கலந்து கொண்டனா்.

2- ஆவது முறை தொடக்க விழா: கடந்த 12- ஆம் தேதி இதே கோயில் வளாகத்தில் மடப்பள்ளி, திருமண மண்டபத்துக்கு என். ராமகிருஷ்ணன் எம்.எல்.ஏ. பூமிபூஜை செய்து பணிகளை அடிக்கல் நாட்டி தொடங்கி வைத்தாா்.

இந்த நிலையில், இதே பணிகளை முதல்வா் மு.க. ஸ்டாலின் காணொலி காட்சி மூலம் தொடங்கி வைத்தது குறித்து நிா்வாக அலுவலா் வி. அருணாதேவியிடம் கேட்ட போது அவா் கூறியதாவது: ஏற்கெனவே இதற்கான பணிகள் தொடங்கி விட்டன. இருந்தாலும் முதல்வா் உத்தரவு என்பதால் இரண்டாவது முறையாக பூமிபூஜை நடைபெற்று பணிகள் சனிக்கிழமை தொடங்கி வைக்கப்பட்டன என்றாா் அவா்.