மழைக்காலத்தில் சாலைகளைத் தோண்டுவதற்கு என்டிஎம்சி தடை

மழைக்காலத்தில் பொதுமக்களின் பாதுகாப்பையும் சீரான போக்குவரத்தையும் உறுதி செய்யும் நோக்கில், ஜூலை 1 முதல் செப். 30 ஆம் தேதி வரை சாலைகளைத் தோண்டுவதற்குத் தடை விதிக்கப்பட்டுள்ளதாக புது தில்லி முனிசிபல் கவுன்சில் (என்டிஎம்சி) தெரிவித்துள்ளது.

இது தொடா்பாக வெளியிடப்பட்ட செய்திக்குறிப்பில், ‘மழைக்காலத்தில் நீா் தேக்கம், சாலை சேதம், போக்குவரத்து நெரிசல் மற்றும் பொதுமக்கள் மற்றும் வாகன ஓட்டிகளுக்கு ஏற்படும் சிரமங்களைத் தவிா்க்கும் வகையில் இந்தத் தீா்மானம் எடுக்கப்பட்டுள்ளது. அதே நேரத்தில், அவசரத் தேவைகளுக்காக மட்டும் என்டிஎம்சி தலைவரின் முன் அனுமதி பெற்றால் விலக்கு வழங்கப்படும்‘ என்று தெரிவிக்கப்பட்டுள்ளது.

தற்போது நடைபெற்று வரும் சாலைப் பணிகள் அனைத்தும் பருவமழை தொடங்கும் முன்பே முடிக்கப்பட்டு, சாலைகள் முறையாகப் பாதுகாப்பட வேண்டும். மேலும், ஏற்கெனவே அனுமதி வழங்கப்பட்ட பணிகள் இன்னும் தொடங்கப்படாத நிலையில், அவை மழைக்காலம் முடியும் வரை நிறுத்தப்படுகின்றன. அவசரச் சூழ்நிலைகளில் என்டிஎம்சி தலைவரின் சிறப்பு அனுமதியின் அடிப்படையில் மட்டுமே பணிகள் மேற்கொள்ளப்படலாம்.

மழைக்காலத்தில் பொதுமக்களின் வசதியும் பாதுகாப்பும் என்டிஎம்சியின் முதன்மை நோக்கமாக உள்ளது. இந்த உத்தரவை அனைத்துத் துறைகளும், பொதுப் பயன்பாட்டு அமைப்புகளும், ஒப்பந்ததாரா்களும் மற்றும் பணிகளை நிறைவேற்றும் நிறுவனங்களும் கட்டாயமாகக் கடைபிடிக்க வேண்டும் என என்டிஎம்சி வெளியிட்ட அறிவிப்பில் தெரிவிக்கப்பட்டுள்ளது.