அரியலூா் பேருந்து நிலைய கட்டுமானத்தில் குறைபாடு: ஒப்பந்ததாரருக்கு ரூ. 10 லட்சம் அபராதம்

அரியலூரில் திறப்பு விழா கண்ட மூன்று மாதங்களில் புதிய பேருந்து நிலைய மேற்கூரையிலிருந்து மழைநீா் கசிந்ததால், கட்டுமான ஒப்பந்ததாரருக்கு ரூ. 10 லட்சம் அபராதம் விதித்து நகராட்சி ஆணையா் அசோக்குமாா் திங்கள்கிழமை உத்தரவிட்டுள்ளாா்.

அரியலூரில் இருந்த பேருந்து நிலையம் சிதிலமடைந்ததால், திமுக ஆட்சியில் ரூ. 11.58 கோடி செலவில் பேருந்து நிலையம் புதிதாக கட்டப்பட்டு, கடந்த மாா்ச் 9-ஆம் தேதி திறக்கப்பட்டது. நிலையத்தை அப்போதைய நகராட்சி நிா்வாகத் துறை அமைச்சா் கே.என். நேரு திறந்துவைத்தாா்.

இந்நிலையில், கடந்த 19-ஆம் தேதி இரவு அரியலுாரில் பெய்த கனமழையின்போது, பேருந்து நிலைய வடக்கு புறம் உள்ள மேற்கூரையில் இரண்டு துாண்கள் (பில்லா்கள்) இணையும் பகுதியில் கசிவு ஏற்பட்டு மழைநீா் ஒழுகியது. பேருந்து நிலைய மேற்கூரையில் இருந்து மழைநீா் கசியும் விடியோ சமூக வலைதளங்களில் வெளியாகி வேகமாக பரவியது.

தகவலறிந்த, அரியலுாா் ஆட்சியா் ந. மிருணாளினி சம்பவ இடத்தில் திங்கள்கிழமை ஆய்வு செய்தாா்.

இதன் தொடா்ச்சியாக, பேருந்து நிலைய கட்டுமானத்தில் ஏற்பட்டுள்ள குறைபாடு காரணமாக ஒப்பந்ததாரருக்கு ரூ. 10 லட்சம் அபராதம் விதித்து நகராட்சி ஆணையா் அசோக்குமாா் உத்தரவிட்டுள்ளாா்.