கொங்கு இளைஞர் பேரவையினர் ஆர்ப்பாட்டம்

கரூரில் சுப்ரமணியன்சுவாமி உருவப்படத்தை எரித்து தமிழ்நாடு கொங்கு இளைஞர் பேரவையினர் புதன்கிழமை ஆர்ப்பாட்டத்தில் ஈடுபட்டனர்.
காவிரி மேலாண்மை வாரியம் அமைக்கும் விஷயத்தில் அவதூறு பேசியதாக பாஜக தலைவர்களில் ஒருவரான சுப்ரமணியன்சுவாமியைக் கண்டித்து, தமிழ்நாடு கொங்கு இளைஞர் பேரவையினர், மனிதநேய ஜனநாயகக் கட்சி ஆகியவை சார்பில் கண்டன ஆர்ப்பாட்டம் கரூர் தலைமை தபால் நிலையம் முன்பு புதன்கிழமை மாலை நடைபெற்றது. 
ஆர்ப்பாட்டத்திற்கு, கொங்கு இளைஞர் பேரவையின் மாவட்டத் தலைவர் அருள்குமார் தலைமை வகித்தார். மனிதநேய ஜனநாயகக் கட்சியின் மாவட்டத் தலைவர் சாதிக் முன்னிலை வகித்தார். 
ஆர்ப்பாட்டத்தில், சுப்ரமணியன்சுவாமியின் உருவப்படத்தை எரித்து கண்டனக்குரல் எழுப்பினர். இதில், தமிழ்நாடு கொங்கு இளைஞர் பேரவையின் சிவசாமி, ராஜீவ் காந்தி உள்ளிட்டோர் திரளாகப் பங்கேற்றனர்.