மாவட்ட அளவிலான கிரிக்கெட் அணிக்கு 30 வீரர்கள் தேர்வு

பெரம்பலூர் மாவட்ட அளவிலான கிரிக்கெட் அணிக்கு 30 வீரர்கள் ஞாயிற்றுக்கிழமை தேர்வு செய்யப்பட்டனர். 
தமிழ்நாடு பள்ளிகள் கிரிக்கெட் சங்கம் சார்பில் நடத்தும் மாநில அளவில், மாவட்டங்களுக்கு இடையிலான தொடர் கிரிக்கெட் போட்டியானது, பெரம்பலூர் தனலட்சுமி சீனிவாசன் கல்லூரி வளாகத்தில் உள்ள மைதானத்தில் ஆக. 1, 2, 3 ஆகிய தேதிகளில் நடைபெற உள்ளது.  
இதையொட்டி, பெரம்பலூர் மாவட்ட அணிக்காக விளையாடும் விளையாட்டு வீரர்கள் தேர்வு முகாம், பெரம்பலூர்- துறையூர் சாலையில் உள்ள தனலட்சுமி சீனிவாசன் பள்ளி மைதானத்தில் ஞாயிற்றுக்கிழமை நடைபெற்றது. பெரம்பலூர் மாவட்ட கிரிக்கெட் சங்கம் சார்பில் நடத்தப்பட்ட இத் தேர்வு முகாமில், 17 வயதுக்குள்பட்ட பள்ளி மாணவர்கள் 200 பேர் பங்கேற்றனர்.  தேர்வு முகாமில் பங்கேற்ற மாணவர்களுக்கு பெளலிங், பேட்டிங், பீல்டிங் ஆகியவை நடத்தப்பட்டு, சிறந்த முறையில் விளையாடிய 30 வீரர்கள் பெரம்பலூர் மாவட்ட கிரிக்கெட் அணிக்காக தேர்வு செய்யப்பட்டனர்.