விழுப்புரம் மாவட்டத்தில் ரயில் மறியல்: 1,016 பேர் கைது

விழுப்புரம் மாவட்டத்தில் புதன்கிழமையும் ரயில், சாலை மறியல் போராட்டங்களில் ஈடுபட்ட திமுக, கம்யூனிஸ்ட், விசிக, நாம் தமிழர் கட்சியினர் 1,016 பேர் கைது செய்யப்பட்டனர்.
காவிரி மேலாண்மை வாரியத்தை அமைக்க மத்திய அரசை வலியுறுத்தி, திமுக, கம்யூனிஸ்ட், விசிக உள்ளிட்ட கட்சியினர் புதன்கிழமையும் ரயில் மறியல் போராட்டங்களில் ஈடுபட்டனர். விழுப்புரம் ரயில் நிலையத்தில் இந்திய கம்யூனிஸ்ட் கட்சி மாவட்டச் செயலாளர் ஏ.வி.சரவணன் தலைமையில் திரண்ட அந்தக் கட்சியினர், முற்பகல் 11.40 மணிக்கு சென்னையிலிருந்து வந்த சோழன் விரைவு ரயிலை மறித்து போராட்டத்தில் ஈடுபட்டனர்.
விழுப்புரம் டிஎஸ்பி சங்கர் தலைமையிலான போலீஸார், மறியல் செய்த 35 பெண்கள் உள்ளிட்ட 150 பேரை கைது செய்தனர்.
திண்டிவனத்தில் திமுக மாவட்டச் செயலாளர் செஞ்சி மஸ்தான் எம்எல்ஏ தலைமையில், எம்எல்ஏக்கள் மாசிலாமணி, சீத்தாபதி சொக்கலிங்கம் ஆகியோர் முன்னிலையில், குருவாயூர் விரைவு ரயிலை மறித்து போராட்டத்தில் ஈடுபட்டனர். இதில் 10 பெண்கள் உள்ளிட்ட 200 பேர் கைது செய்யப்பட்டனர். இதேபோல, உளுந்தூர்பேட்டையில் திமுக ஒன்றியச் செயலர் வைத்தியநாதன் தலைமையில் ரயில் மறியலில் ஈடுபட்ட 70 பேரும், திருவெண்ணெய்நல்லூரில் திமுக ஒன்றியச் செயலர் துரைராஜ் தலைமையில் ரயில் மறியல் செய்த 60 பேரும், கள்ளக்குறிச்சியில் திமுக நகரச் செயலர் சுப்பராயலு தலைமையில் சாலை மறியல் செய்த 59 பேரும், சங்கராபுரத்தில் சாலை மறியல் செய்த ஒன்றியச் செயலர் ஆறுமுகம் தலைமையில் 42 பேரும், சின்னசேலத்தில் உதயசூரியன் எம்எல்ஏ தலைமையில் ரயில் மறியல் செய்த 365 பேரும் கைது செய்யப்பட்டனர்.
கள்ளக்குறிச்சி அருகே மாடூர் சுங்கச்சாவடியில் மறியல் போராட்டத்தில் ஈடுபட்ட ஜீவானந்தம் தலைமையிலான நாம் தமிழர் கட்சியினர் 30 பேர் கைது செய்யப்பட்டனர்.
இந்த வகையில், மாவட்டம் முழுவதும் மறியல் போராட்டத்தில் ஈடுபட்ட 60 பெண்கள் உள்ளிட்ட 1,016 பேர் கைது செய்யப்பட்டு, மாலையில் விடுவிக்கப்பட்டனர்.