சென்னை பல்கலை. இளநிலை பட்டப் படிப்பு தேர்வு முடிவுகள் வெளியீடு

இளநிலை பட்டப் படிப்பு தேர்வு முடிவுகளை சென்னைப் பல்கலைக்கழகம் வெளியிட்டுள்ளது. தேர்வு முடிவுகளை  www.unom.ac.in, www.ideunom.ac.in ஆகிய இணையதளங்களில் தெரிந்து கொள்ளலாம்.

மறு மதிப்பீடு: இளநிலை பட்டப் படிப்புகளில் 2010-11 கல்வியாண்டு முதல் சேர்ந்த மாணவர்கள்,தேர்வுத் தாள் மறு மதிப்பீட்டுக்கு விண்ணப்பிக்கலாம். மறு மதிப்பீட்டுக்கு ஒரு தாளுக்கு ரூ. 750 வீதம் வரைவோலை எடுத்து வரும் 17-ஆம் தேதிக்குள் அனுப்ப வேண்டும்.

மறு கூட்டல்: மாணவர்கள் தேர்வுத் தாள் மதிப்பெண் மறு கூட்டலுக்கும் விண்ணப்பிக்கலாம். மறு கூட்டலுக்கு தாள் ஒன்றுக்கு ரூ. 200 வீதம் வரைவோலை எடுத்து அனுப்ப வேண்டும். வரைவோலையை பதிவாளர், சென்னைப் பலைகலைக்கழகம் என்ற பெயருக்கு எடுக்க

வேண்டும்.

உடனடி தேர்வு: இளநிலை பட்டப் படிப்பில் ஐந்து பருவத் தேர்வுகள் வரை எந்தவொரு பாடத்திலும் தோல்வியடையாமல், ஆறாவது பருவத் தேர்வில் ஒரு பாடத்தில் மட்டும் தோல்வியுற்றவர்கள் உடனடி தேர்வுக்கு விண்ணப்பிக்க தகுதி பெற்றவர்கள்.

இந்த உடனடி தேர்வுக்கு வரும் 17-ஆம் தேதிக்குள் விண்ணப்பிக்க வேண்டும். சென்னை அண்ணா நகரில் உள்ள ஸ்ரீ கிருஷ்ணசாமி பெண்கள் கல்லூரியில் ஜூலை 27-ஆம் தேதி காலை 10 மணி முதல் மதியம் 1 மணி வரை இந்த உடனடி தேர்வு நடத்தப்படும். இதற்கான தேர்வு நுழைவுச் சீட்டை சென்னைப் பல்கலைக்கழக இணைய தளத்திலிருந்து வரும் 25-ஆம் தேதி முதல் பதிவிறக்கம் செய்து கொள்ளலாம்.

மறு மதிப்பீடு, மறு கூட்டல் மற்றும் உடனடி தேர்வுக்கான விண்ணப்பங்களை www.unom.ac.in  இணைய தளத்திலிருந்து பதிவிறக்கம் செய்து கொள்ளலாம்.