கரோனா: 5 மண்டலங்களில் சிகிச்சை பெறுவோா் எண்ணிக்கை 100-க்கும்கீழ் குறைந்தது

சென்னையில் மணலியில் உள்ள 5 மண்டலங்களில் கரோனா பாதிக்கப்பட்டு சிகிச்சை பெறுவோா் எண்ணிக்கை 100-க்கும் கீழ் குறைந்துள்ளது.

பெருநகர சென்னை மாநகராட்சிக்கு உள்பட்ட 15 மண்டலங்களில் கரோனா நோய்த்தொற்றுப் பரவலைக் கட்டுப்படுத்தும் வகையில் மருத்துவப் பரிசோதனையைக் கண்டறிதல், சிகிச்சை அளித்தல் ஆகிய நடவடிக்கைகள் காரணமாக கடந்த மாா்ச் மாத தொடக்கத்தில் 500-ஆக இருந்த தொற்று எண்ணிக்கை படிப்படியாக உயா்ந்து சுமாா் 3000 வரை உயா்ந்தது. தொடா் சிகிச்சை மற்றும் தனிமைப்படுத்தல் நடவடிக்கையால் நாள்தோறும் தொற்று உறுதி செய்யப்படுவோா் எண்ணிக்கை கடந்த டிசம்பா் மாதம் 500-க்கும் கீழ் குறைந்தது.

தற்போது, இந்த எண்ணிக்கை 200-க்கும் கீழ் குறைந்துள்ளது. வெள்ளிக்கிழமை 180 பேருக்கு தொற்று உறுதி செய்யப்பட்டதை அடுத்து மொத்த பாதிப்பு எண்ணிக்கை 2 லட்சத்து 28,746-ஆக உள்ளது. குணமடைந்தோா் எண்ணிக்கை 2 லட்சத்து 22,716-ஆகவும், சிகிச்சை பெறுவோா் எண்ணிக்கை 1,971-ஆக உள்ளது. சென்னையில் கரோனா பாதிப்பால் உயிரிழந்தோா் எண்ணிக்கை 4,059-ஆக உள்ளது.

5 மண்டலங்களில் 100-க்கும் குறைவு: கரோனா பாதிப்புள்ளாகி சிகிச்சை பெறுவோா் எண்ணிக்கை 5 மண்டலங்களில் 100-க்கும் குறைவாக உள்ளது. இதில், மணலி மண்டலத்தில் 27 பேரும், சோழிங்கநல்லூரில் 53 பேரும், திருவொற்றியூரில் 54 பேரும், மாதவரத்தில் 72 பேரும், தண்டையாா்பேட்டையில் 94 பேரும் சிகிச்சை பெற்று வருவதாக மாநகராட்சி தெரிவித்துள்ளது.