முதல் 10 இடத்தில் புஜாரா, அஸ்வின், ஓஜா

சர்வதேச கிரிக்கெட் கவுன்சில் (ஐசிசி) டெஸ்ட் தரவரிசைப் பட்டியலில் இந்திய வீரர்கள் புஜாரா, அஸ்வின், ஓஜா ஆகியோர் மட்டும் முதல் 10 இடத்தில் இடம் பெற்றுள்ளனர்.

பேட்ஸ்மேன்கள் வரிசையில் புஜாரா 7-வது இடத்தையும், பந்து வீச்சாளர்கள் வரிசையில் அஸ்வின் 6-வது இடத்தையும் தக்கவைத்துக் கொண்டுள்ளனர். ஓஜா 10-வது இடத்தில் உள்ளார். மற்ற இந்திய வீரர்கள் யாரும் முதல் 10 இடத்துக்குள் வரவில்லை. தென்னாப்பிக்காவின் ஹஷிம் ஆம்லா பேட்ஸ்மேன்கள் பட்டியலில் முதலிடத்தில் உள்ளார்.

மேற்கிந்தியத் தீவுகளின் சந்தர்பால், தென்னாப்பிரிக்காவின் மற்றொரு வீரர் டிவில்லியர்ஸ் ஆகியோர் முறையே 2,3-வது இடத்தில் உள்ளனர். பேட்ஸ்மேன்கள் தரவரிசையில் கேப்டன் தோனி 22-வது இடத்தில் உள்ளார். விராட் கோலி 24-வது இடமும், சச்சின் 26-வது இடமும் பெற்றுள்ளனர்.

தென்னாப்பிரிக்க வேகப்பந்து டேல் ஸ்டெயின் பந்துவீச்சாளர்கள் பட்டியலில் முதலிடத்தில் உள்ளார். தென்னாப்பிரிக்காவின் மற்றொரு பந்துவீச்சாளர் பிலாண்டர், இலங்கையின் ரங்கணா ஹெராத் ஆகியோர் முறையே 2,3-வது இடத்தைப் பிடித்துள்ளனர்.

ஜிம்பாப்வே கேப்டன் பிரென்டன் டெய்லர், தரவரிசையில் 41 இடங்கள் முன்னேறி 29 இடத்தைப் பிடித்துள்ளார். இதுவே தரவரிசைப் பட்டியலில் அவரது அதிகபட்ச இடமாகும். வங்கதேசத்துக்கு எதிரான டெஸ்ட் ஆட்டத்தில் இரு இன்னிங்ஸிலும் சதம் அடித்ததன் மூலம் அவர் இந்த முன்னேற்றத்தை அடைந்துள்ளார்.

ஒருநாள் கிரிக்கெட் தரவரிசையில் இந்திய அணி முதலிடத்தில் உள்ளது. டெஸ்ட் மற்றும் 20-வது ஓவர் கிரிக்கெட் போட்டி தரவரிசையில் 3-வது இடம் பிடித்துள்ளது.