ஓரிரு இடங்களில் மழைக்கு வாய்ப்பு

தமிழகத்தில் ஓரிரு இடங்களில் அடுத்த 24 மணி நேரத்தில் மழை பெய்ய வாய்ப்பு உள்ளது. 
சென்னையில் வானம் பொதுவாக மேகமூட்டமாகக் காணப்படும். சில இடங்களில் லேசான மழை பெய்ய வாய்ப்புள்ளது. மாலை, இரவில் இடி மேகம் உருவாகக்கூடும்.
தேவாலாவில் 40 மி.மீ.: தமிழகத்தில் திங்கள்கிழமை காலை 8.30 மணி வரையிலான 24 மணி நேரத்தில் அதிகபட்சமாக, நீலகிரி மாவட்டம் தேவாலாவில் 40 மி.மீ., கோவை மாவட்டம் வால்பாறையில் 30 மி.மீ., நீலகிரி மாவட்டம் நடுவட்டத்தில் 20 மி.மீ. மழை பதிவானது.
மீனவர்களுக்கு எச்சரிக்கை: தமிழகம் மற்றும் புதுச்சேரியின் கடலோரப் பகுதிகளில் தெற்கு மற்றும் தென்மேற்கு திசையில் இருந்து பலமான காற்று வீசக்கூடும்.
மதுரையில் 102 டிகிரி: தமிழகத்தில் 3 இடங்களில் வெப்பநிலை திங்கள்கிழமை 100 டிகிரியைக் கடந்தது. அதிகபட்சமாக மதுரை விமான நிலையத்தில் 102 டிகிரியும், நாகையில் 101 டிகிரியும், தூத்துக்குடியில் 100 டிகிரியும் வெப்பநிலை பதிவானது. சென்னை மீனம்பாக்கத்தில் 99 டிகிரியும், திருச்சி, தொண்டி, வேலூர், கடலூர், சென்னை நுங்கம்பாக்கம் ஆகிய இடங்களில் தலா 98 டிகிரியும் வெப்பநிலை பதிவானது.