தூத்துக்குடி துப்பாக்கிச்சூடு சம்பவம்: 27-இல் இரண்டாம் கட்ட விசாரணை: எஸ்சி, எஸ்டி ஆணைய துணைத் தலைவர்

தூத்துக்குடி துப்பாக்கிச் சூடு சம்பவம் தொடர்பாக இரண்டாம் கட்ட விசாரணை சென்னையில் வரும் 27-ஆம் தேதி நடைபெறும் என தேசிய தாழ்த்தப்பட்டோர் ஆணையத் துணைத் தலைவர் எல். முருகன் தெரிவித்தார்.
நாமக்கல்லில் அவர் செய்தியாளர்களுக்கு திங்கள்கிழமை அளித்த பேட்டி: 
தூத்துக்குடி ஸ்டெர்லைட் ஆலைக்கு எதிராகப் போராடியவர்கள் மீது போலீஸார் நடத்திய துப்பாக்கிச் சூடு சம்பவத்தில் உயிரிழந்தவர்களில் 4 பேர் தாழ்த்தப்பட்ட வகுப்பைச் சேர்ந்தவர்கள். இதையடுத்து ஆணையம் சார்பில் தூத்துக்குடி சென்று அங்கு நேரடியாக விசாரணை நடத்தப்பட்டது.
தற்போது ஸ்டெர்லைட் ஆலைக்கும், அரசு அதிகாரிகளுக்கும் சம்மன் அனுப்பப்பட்டுள்ளது. அதன்படி வரும் 27-ஆம் தேதி சென்னையில் 2-ஆம் கட்டமாக விசாரணை நடத்தப்படும். அதன்பிறகு குடியரசுத் தலைவருக்கு அறிக்கை தாக்கல் செய்யப்படும். 
தமிழகம் முழுவதும் மாவட்டங்களில் மேற்கொண்ட ஆய்வின்படி இதுவரை 2 லட்சம் ஏக்கர் பஞ்சமி நிலங்கள் கண்டறியப்பட்டு, கையகப்படுத்தப்பட்டுள்ளது.
பஞ்சமி நிலங்கள் வாரிசுதாரர்களுக்கு வழங்கப்படும். இல்லையெனில் தாழ்த்தப்பட்டவர்களுக்கான திட்டங்களுக்கு உபயோகப்படுத்தப்படும். 
நாமக்கல் மாவட்டத்தில் ஆய்வு மேற்கொண்டதில் 130 ஏக்கர் பஞ்சமி நிலங்கள் கண்டறியப்பட்டுள்ளன. இதுதொடர்பாக சம்பந்தப்பட்டவர்களுக்கு நோட்டீஸ் வழங்கப்பட்டுள்ளது என்றார்.