தீவிரவாதிகள் தாக்குதலில் 2 வீரர்கள் சாவு

தாய்லாந்தில் தீவிரவாதிகள் நடத்திய தாக்குதலில் 2 ராணுவ வீரர்கள் உயிரிழந்தனர். 6 வீரர்கள் காயமடைந்தனர்.

இத்தாக்குதல் தாய்லாந்தின் தெற்குப் பகுதியில் உள்ள பட்டனி மாகாணத்தில் உள்ள 8 மாவட்டங்களில் புதன்கிழமை மாலை நடந்தது.

அரசு அலுவலகங்கள், செல்போன் கோபுரங்கள், அங்காடிகள் உள்ளிட்ட 32 இடங்களைக் குறி வைத்து தீவிரவாதிகள் இத்தாக்குதலை நிகழ்த்தியுள்ளனர்.

முஸ்லிம் மக்கள் பெரும்பான்மையாக வாழ்ந்து வரும் தாய்லாந்தின் தெற்குப் பகுதியில் கடந்த 9 ஆண்டுகளாக இதுபோன்ற நடந்து வரும் தீவிரவாதத் தாக்குதலால் சுமார் 5 ஆயிரம் பேர் உயிரிழந்துள்ளனர். தீவிரவாதிகளுடன் தாய்லாந்து அரசு கடந்த மார்ச் மாதம் ஒருநாள் பேச்சு வார்த்தையில் ஈடுபட்டது.

இந்தப் பேச்சு வார்த்தை மலேசியாவில் நடந்தது. பேச்சுவார்த்தையின் முடிவில், பேச்சுவார்த்தை சுமுகமாக நடந்ததாகவும், அடுத்த கட்ட பேச்சுவார்த்தை வரும் 29-ம் தேதி நடைபெற உள்ளதாகவும் தெரிவிக்கப்பட்டது.