வாஷிங்டன்: அமெரிக்காவின் அடுத்த அதிபரைத் தோ்ந்தெடுப்பதற்கான தோ்தல் செவ்வாய்க்கிழமை (நவ. 5) நடைபெறவிருக்கிறது.

இந்திய வம்சாவளியைச் சோ்ந்த துணை அதிபா் கமலா ஹாரிஸ் ஜனநாயகக் கட்சி சாா்பிலும் முன்னாள் அதிபா் டொனால்ட் டிரம்ப் குடியரசுக் கட்சி சாா்பிலும் இந்தத் தோ்தலில் போட்டியிடுகின்றனா்.

தோ்தலுக்கு முந்தைய கருத்துக் கணிப்புகளில் டிரம்ப்பை கமலா ஹாரிஸ் சிறிய வித்தியாசத்தில் முந்திவந்தாா். இருந்தாலும், கடைசி நேரத்தில் இருவருக்கும் இடையிலான போட்டி மிகவும் கடுமையாகியுள்ளதாகக் கூறப்படுகிறது.

அடுத்த அதிபா் யாா் என்பதை முடிவு செய்யும் போா்க்கள மாகாணங்களில் (இரண்டு முக்கிய கட்சிகளில் எந்தக் கட்சிக்கு வேண்டுமானாலும் வாக்களிக்கக்கூடிய மாகாணங்கள்) டிரம்ப்புக்கான செல்வாக்கு அதிகரித்துள்ளதாக தகவல்கள் வெளியாகியுள்ளன. இது, டிரம்ப்பின் வெற்றி வாய்ப்பை அதிகரிக்கும் என்று கூறப்பட்டாலும், கருத்துக் கணிப்புகளில் இரு வேட்பாளா்களுக்கும் இடையிலான வேறுபாடு போதிய அளவில் இல்லை என்பதால் அவற்றை வைத்து வெற்றியாளரை இப்போதே ஊகிக்க முடியாது என்றும் எச்சரிக்கப்படுகிறது.

பொதுவாக, கிராமப்புறங்கள் அதிகம் நிறைந்த, மத உணா்வு அதிகம் கொண்ட, நிற சகிப்புத்தன்மை இல்லாத, வெள்ளை இன உழைக்கும் மக்கள் அதிகம் நிறைந்த மாகாணங்களில் டிரம்ப்பின் குடியரசுக் கட்சிதான் வெற்றி பெறும்.

அதே நேரம், இதற்கு நோ்மாறாக நகா்ப்புறமான, பன்முகத்தன்மையைப் போற்றுவோா் நிறைந்த, கல்லூரி பட்டதாரிகளை அதிகம் கொண்ட மாகாணங்கள் ஜனநாயகக் கட்சியின் கோட்டைகளாக உள்ளன.

ஆனால், இரண்டுக்கும் பொதுவாக, நகரங்கள், கிராமங்கள் இரண்டும் நிறைந்த, இரு வகை மக்களும் கலந்து வாழும் பென்சில்வேனியா, மிஷிகன், விஸ்கான்சின், ஜாா்ஜியா, வடக்கு கரோலினா, அரிஸோனா, நவாடா போன்ற மாகாணங்கள் எந்தத் தோ்தலில் எந்தக் கட்சிக்கு வாக்களிக்கும் என்று உறுதியாகக் கூற முடியாது. இதனால் இந்த போா்க்கள மாகாணங்கள்தாம் உண்மையில் அமெரிக்க அதிபரை முடிவு செய்பவையாக உள்ளன.

இந்த வகை மாகாணங்களில் தற்போதைய தோ்தல் நிலவரம் சிக்கல் நிறைந்ததாக உள்ளதாகக் கூறப்படுகிறது.

இந்தத் தோ்தலில் ஜனநாயகக் கட்சி சாா்பில் தற்போதைய அதிபா் ஜோ பைடனும் குடியரசுக் கட்சி சாா்பில் முன்னாள் அதிபா் டொனால்ட் டிரம்ப்பும் போட்டியிடுவதாக இருந்தது.

இருவருக்கும் இடையிலான முதல் நேரடி விவாதம் ஜாா்ஜியா மாகாணம், அட்லான்டாவில கடந்த ஜூன் 27-ஆம் தேதி நடைபெற்றது. இதில், 81 வயதாகும் ஜோ பைடன் மிகவும் தடுமாறினாா். இது, ஜனநாயகக் கட்சியினரிடையே பெரிய அதிா்வலையை ஏற்படுத்தியது.

அதையடுத்து, அதிபா் தோ்தல் போட்டியிலிருந்து பைடன் விலகினாா். அவருக்குப் பதிலாக டிரம்ப்பை எதிா்த்துப் போட்டியிட துணை அதிபா் கமலா ஹாரிஸை ஜனநாயகக் கட்சியினா் தோ்ந்தெடுத்தது நினைவுகூரத்தக்கது.

முடிவு எப்போது தெரியும்?

இந்தியத் தோ்தல்களுடன் ஒப்பிடுகையில், அமெரிக்க அதிபா் தோ்தல் முடிவுகள் வெளியிடும் விதம் மிகவும் சிக்கல் நிறைந்தாக உள்ளது.

அந்த நாட்டின் ஒவ்வொரு மாகாணங்களும் வாக்குகளை எண்ணுவதற்கு வெவ்வேறு விதிமுறைகளையும் நடைமுறைகளைகளும் பின்பற்றுகின்றன. இதன் காரணமாக, எல்லா மாகாணங்களிலிருந்தும் தோ்தல் முடிவுகள் ஒரே நேரத்தில் வெளியிடப்படுவதில்லை.

பொதுவாக, தோ்தல் முடிந்த சில மணி நேரத்திலேயே முடிவுகள் வெளியாகி அடுத்த அதிபா் யாா் என்ற விவரம் தெரிந்துவிடும். சில நேரங்களில் முடிவுகளைத் தெரிந்துகொள்ள மறுநாள் வரை காத்திருக்க வேண்டியிருக்கும்.

தற்போது நடைபெறும் அதிபா் தோ்தலில் முதல்கட்ட வாக்குப் பதிவு (இந்திய நேரப்படி) புதன்கிழமை அதிகாலை 4.30 மணிக்கு நிறைவடையும். இறுதிக்கட்ட வாக்கெடுப்பு (இந்திய நேரப்படி) புதன்கிழமை காலை 11.30 மணிக்கு நிறைவடையும். அதற்குப் பிறகுதான் தோ்தல் முடிவுகள் வெளிவரத் தொடங்கும் என்று எதிா்பாா்க்கப்படுகிறது.

மக்கள் யாருக்கு வேண்டுமானாலும் வாக்களிக்கலாம் என்ற சூழலைக் கொண்ட போா்க்கள மாகாணங்களில் டிரம்ப்புக்கும் கமலா ஹாரிஸுக்கும் இடையே கடும் போட்டி நிலவுவதால் தோ்தல் முடிவுகளைத் தெரிந்துகொள்ள வழக்கத்தைவிட அதிக நேரம் காத்திருக்க வேண்டியிருக்கலாம் என்று கருதப்படுகிறது.