நடிகர் சங்கத்திலிருந்து நீக்கம்: குமரிமுத்து மனு தள்ளுபடி

நடிகர் சங்கத்தின் அடிப்படை உறுப்பினர் பதவியிலிருந்து நீக்கப்பட்டதை எதிர்த்து குமரி முத்து தாக்கல் செய்த மனுவை 11-ஆவது உதவி அமர்வு நீதிமன்றம் தள்ளுபடி செய்தது.

சென்னையில் நடிகர் சங்கத்துக்குச் சொந்தமான இடத்தை வணிக வளாகத்துக்கு குத்தகைக்கு விட்டது குறித்தும், சங்கத்தின் உறுப்பினர் சந்தா தொகையை உயர்த்தியது குறித்தும் நடிகர் குமரிமுத்து குற்றம்சாட்டியிருந்தார். இந்த நிலையில் அவர் அடிப்படை உறுப்பினர் பதவியில் இருந்து நீக்கப்பட்டார்.

இதை எதிர்த்து சென்னை அமர்வு நீதிமன்றத்தில் குமரிமுத்து வழக்கு தாக்கல் செய்தார். இதற்கு பதிலளித்த நடிகர் சங்கம், செயற்குழு கூடி உரிய முறையில் தீர்மானம் நிறைவேற்றிய பிறகுதான் அவர் நீக்கப்பட்டார் எனவும், அதில் உள்நோக்கம் எதுவும் இல்லை எனவும் தெரிவித்திருந்தனர். இந்த வழக்கை விசாரித்த 11-ஆவது உதவி அமர்வு நீதிமன்ற நீதிபதி இந்திராணி, நடிகர் குமரிமுத்துவின் மனுவை தள்ளுபடி செய்து உத்தரவிட்டார்.