ஆஸ்கர் விருது பெற்ற பிரபல இயக்குநர் காலமானார்!

தி லாஸ்ட் எம்ப்ரர் படத்துக்காக ஆஸ்கர் விருது வென்ற இத்தாலி இயக்குநர் பெர்னார்டோ பெர்டோலூச்சி காலமாகியுள்ளார். அவருக்கு வயது, 77.

ரோம் நகரில் உள்ள தனது இல்லத்தில் அவர் காலமாகியுள்ளதாக அதிகாரபூர்வமாக அறிவிக்கப்பட்டுள்ளது. 

1988-ல் தி லாஸ்ட் எம்ப்ரர் படம் 9 ஆஸ்கர் விருதுகளுக்குப் பரிந்துரைக்கப்பட்டு அனைத்தையும் வென்றது. சிறந்த படம், சிறந்த இயக்குநர் விருதுகளின் மூலம் பெர்னார்டோ அதிகப் புகழை அடைந்தார். 

1941-ல் பிறந்த பெர்னார்டோ தனது தந்தையைப் போல கவிஞர் ஆக விரும்பினார். ஆனால் திரைப்பட இயக்குநராகி, 1962-ல் அவருடைய முதல் படம் (The Grim Reaper) வெளிவந்தது. மார்லன் பிராண்டோ நடித்த லாஸ்ட் டாங்கோ இன் பாரிஸ் படம் மூலமாக சர்வதேசக் கவனம் அடைந்தார். 1972-ல் வெளியான இந்தப் படம் அவருடைய சொந்த நாடான இத்தாலியில் தடை செய்யப்பட்டு, 1987-ல்தான் அதன் தடை விலக்கிக்கொள்ளப்பட்டது. தி ஷெல்டரிங் ஸ்கை, லிட்டில் புத்தா போன்ற படங்களையும் அவர் இயக்கியுள்ளார். 

பெர்னார்டோவின் மறைவுக்குத் திரையுலகப் பிரபலங்கள் இரங்கல் தெரிவித்துள்ளார்கள்.