மணி ரத்னம் படங்களில் அதிக வசூலைப் பெறவிருக்கும் செக்கச் சிவந்த வானம்!

மணி ரத்னம் இயக்கத்தில் உருவாகியுள்ள செக்கச் சிவந்த வானம் படத்தில் சிம்பு, விஜய் சேதுபதி, அரவிந்த் சாமி, அருண் விஜய், ஜோதிகா, ஐஸ்வர்யா ராஜேஷ், அதிதி ராவ், டயானா எரப்பா போன்றோர் நடித்துள்ளார்கள். இசை: ஏ.ஆர்.ரஹ்மான். ஒளிப்பதிவு: சந்தோஷ் சிவன், படத்தொகுப்பு: ஸ்ரீகர் பிரசாத். மெட்ராஸ் டாக்கீஸ் நிறுவனமும் லைகா நிறுவனமும் இணைந்து இப்படத்தைத் தயாரித்துள்ளன. 

முதல் நாள் வசூலை விடவும் நேற்று அதிக வசூல் கிடைத்துள்ளது. முதல் நாளன்று ரூ. 8 கோடி வசூலித்த இந்தப் படம் அடுத்த இரு நாள்களில் ரூ. 6.20 மற்றும் ரூ. 7.50 கோடிகளை வசூலாகப் பெற்றுள்ளது. எனினும் நேற்றைய வசூல் முதல் நாள் வசூலை விடவும் அதிகமாக உள்ளதாகக் கூறப்படுகிறது. இதனால் இதுவரை ரூ. 30 கோடிக்கும் அதிகமாக வசூலித்துள்ள இந்தப் படம் வரும்நாள்களில் தமிழ்நாட்டில் மட்டும் ரூ. 50 கோடி வசூலை எட்டும் என்று கணிக்கப்படுகிறது. நாளை விடுமுறை என்பதால் இது சாத்தியமாகும் வாய்ப்புகள் அதிகமாக உள்ளன.

சென்னையில் கிட்டத்தட்ட ரூ. 4 கோடி வசூலை (ரூ. 3.80) நான்கு நாளில் பெற்றுள்ளது. மேலும் கர்நாடகாவில் ரூ. 2.70 கோடி வசூலை இதுவரை பெற்றுள்ளது. இத்தகவல்கள் திரையுலக வணிக வட்டாரங்களில் சொல்லப்பட்டாலும் படத்தின் அதிகாரபூர்வமான வசூல் விவரங்கள் இதுவரை வெளியிடப்படவில்லை.